زہران ممدانی کی امریکا کی جانب سے وینزویلا پر حملے کی شدید مذمت

نیو یارک سٹی کے نو منتخب میئر زوہران ممدانی نے کہا ہے کہ انہوں نے وینزویلا کے صدر نکولس مادورو اور ان کی اہلیہ کی امریکی حراست پر اپنے تحفظات براہِ راست امریکی صدر ڈونلڈ ٹرمپ تک پہنچا دیے ہیں۔ ممدانی کے مطابق یہ اقدام بین الاقوامی اصولوں اور خودمختار ریاستوں کے قوانین کی سنگین خلاف ورزی ہے۔

میئر زوہران ممدانی نے ایک پریس کانفرنس میں بتایا کہ انہوں نے صدر ٹرمپ سے فون پر بات کر کے واضح کیا کہ وہ وینزویلا کی قیادت کے خلاف اس یکطرفہ کارروائی کی مخالفت کرتے ہیں۔ ان کا کہنا تھا کہ انہوں نے اپنا مؤقف صاف الفاظ میں پیش کیا، تاہم صدر ٹرمپ کے ردعمل کی تفصیل بتانے سے گریز کیا۔

واضح رہے کہ نکولس مادورو اور ان کی اہلیہ سیلیا فلورس کے خلاف نیویارک کے سدرن ڈسٹرکٹ میں فردِ جرم عائد کی جا چکی ہے اور دونوں کو امریکا منتقل کیا جا رہا ہے، جہاں ان پر وفاقی الزامات کے تحت مقدمہ چلایا جائے گا۔

زوہران ممدانی نے کہا کہ انہیں ہفتے کی صبح اپنے حلف اٹھانے کے چند دن بعد ہی سٹی انتظامیہ کے اعلیٰ حکام، چیف آف اسٹاف اور پولیس کمشنر نے اس کارروائی اور مادورو کی نیویارک منتقلی کے حوالے سے بریفنگ دی۔

سوشل میڈیا پلیٹ فارم ایکس پر جاری بیان میں میئر ممدانی کا کہنا تھا کہ کسی خودمختار ملک کے خلاف یکطرفہ کارروائی جنگ کے مترادف اور ملکی و بین الاقوامی قوانین کی خلاف ورزی ہے۔ انہوں نے یہ بھی کہا کہ اس صورتحال کے اثرات نیویارک میں مقیم وینزویلا کی کمیونٹی پر بھی پڑ سکتے ہیں، اس لیے ان کی انتظامیہ عوامی تحفظ کو اولین ترجیح دیتے ہوئے تمام پیش رفت پر گہری نظر رکھے ہوئے ہے۔