64 سالہ شہری کے پیٹ میں پھنسا ٹوتھ برش 52 برس بعد نکال لیا گیا

چین کے صوبے گوانگ ڈونگ میں ڈاکٹروں نے ایک غیر معمولی طبی معاملے کا سامنا کیا، جہاں انہوں نے 64 سالہ مریض کی آنت سے 17 سینٹی میٹر لمبا ٹوتھ برش نکالا جو اس کے جسم میں 52 سال سے موجود تھا۔  

مریض یانگ (64 سال) پیٹ میں شدید درد کی شکایت لے کر ہسپتال پہنچا۔ طبی معائنے کے دوران چھوٹی آنت میں غیر معمولی چیز دریافت ہوئی ۔ 

اینڈوسکوپک سرجری کے ذریعے 80 منٹ کی کوششوں کے بعد ٹوتھ برش نکالا گیا۔  

یانگ نے اعتراف کیا کہ وہ 12 سال کی عمر میں غلطی سے ٹوتھ برش نگل گیا تھا ۔ خوف کی وجہ سے اس نے والدین کو بتایا نہیں تھا اور اسے امید تھی کہ برش خود بخود خارج ہو جائے گا ۔

ڈاکٹروں کا کہنا ہے کہ یہ معاملہ انتہائی غیر معمولی اور خطرناک تھا، برش کے طویل عرصے تک رہنے سے آنتوں کو شدید نقصان پہنچ سکتا تھا ۔ خوش قسمتی سے برش آنت کے ایک کونے میں محفوظ طریقے سے پھنسا رہا۔

ڈاکٹر نے کہا کہ ایسی صورت میں آنت میں سوراخ ہونے کا خطرہ ہوتا ہے جو جان لیوا ثابت ہو سکتا ہے ۔ 

اسپتال اور اہل خانہ کے مطابق سرجری کے بعد یانگ کی صحت بہتر ہے، وہ معمول کی زندگی گزار رہا ہے  تاہم ڈاکٹروں نے مزید احتیاطی معائنے کی ہدایت کی ہے ۔