مجھ سے زیادہ بلی کا خیال، خاتون شوہر کیخلاف عدالت چلی گئی

بھارت میں ایک خاتون نے خود سے زیادہ پالتو بلی کا خیال رکھنے پر شوہر کے خلاف عدالت سے رجوع کرلیا۔

بھارتی میڈیا رپورٹ کے مطابق ریاست کرناٹک کی ہائیکورٹ میں خاتون نے اپنے اوپر ہونے والے ظلم کے حوالے سے درخواست دائر کی اور دعویٰ کیا کہ شوہر مجھ سے زیادہ پالتو بلی کا خیال رکھتا ہے۔

اس درخواست کو عدالت نے سماعت کیلیے مقرر کیا اور دوران سماعت جج نے خاتون پر برہمی کا اظہار کرتے ہوئے اُن سے ڈانٹ ڈپٹ کی۔

جج جسٹس ایم ناگاپراسنا نے کہا کہ شکایت میں ظلم یا ہراسانی کا کوئی خاص الزام نہیں لگایا گیا، اس کے بجائے مدعی نے شوہر کے بارے میں کہا کہ وہ بجائے اس کے گھر میں موجود پالتو بلی کی دیکھ بھال زیادہ کرتا ہے۔

درخواست میں یہ بھی کہا گیا کہ جب بھی وہ اپنے شوہر سے اس رویے کے بارے میں بات کرتی تو وہ دونوں بحث پر الجھ جاتے اور ایک دوسرے کو طعنے دیتے۔

خاتون نے دعویٰ کیا کہ بلی اُن سے جلتی ہے اور اسی وجہ سے کئی بار حملہ کرچکی ہے اور اس بارے میں شوہر کو معلوم ہونے کے باوجود انہوں نے بلی کو گھر سے نہیں نکالا۔

عدالت نے اس غیرسنجیدہ مقدمے کو مسترد کرتے ہوئے شوہر کے خلاف تحقیقات کو روک دیا اور خاتون کو اس فضول شکایت پر ڈانٹا۔ جج نے کہا اس قسم کی درخواستیں ہی ہیں جو بھارت کے نظامِ عدل میں تاخیر کرواتی ہیں۔