’قیامت کے دن کی علامت والی‘ پراسرار مچھلی دریافت

امریکی ریاست کیلی فورنیا کےساحل سے قیامت کے دن کی علامت سمجھی جانے والی نایاب مچھلی دریافت ہونے پر لوگوں میں کھلبلی مچ گئی۔

یونیورسٹی آف کیلی فورنیا، سان ڈیاگو انسٹی ٹیوٹ آف اوشیانو گرافی کے مطابق پی ایچ ڈی کے ایک طالب علم نے سمندر میں ’اینسینیٹاس‘ نامی مچھلی دیکھی جس کی لمبائی تقریبا دس فٹ تھی۔

ربن شکل والی مچھلی عام طور پر گہرے سمندر کے ایک ایسے خاص حصے میں رہتی ہے جہاں کسی قسم کی روشنی نہیں پھیلتی اور کچھ لوگوں کا عقیدہ یہ ہے کہ یہ مچھلی قیامت کے دن سامنے آتی ہے۔

ماننے والے یہ بھی کہتے ہیں کہ یہ مچھلی ساحل پر زلزلے یا قدرتی آفات آنے سے قبل آتی ہے، حیران کن طور پر 2011 کے زلزلے سے چند ماہ قبل جاپان کے ساحل پر یہی مچھلی دریافت ہوئی تھی۔

یہ پہلا موقع نہیں بلکہ رواں سال کا دوسرا واقعہ ہے جب اورفش ساحل پر دریافت ہوئی ہے، ماہرین کے مطابق 1901 سے اب تک صرف کیلی فورنیا کے ساحل پر اس مچھلی کو 20 بار سے زائد دیکھا گیا ہے۔

ماہرین کا خیال ہے کہ زلزلے سے پہلے بڑی مقدار میں کاربن مونو آکسائیڈ گیس خارج ہوتی ہے، جس سے گہرے سمندر میں رہنے والی مخلوقات متاثر ہوتی ہیں۔