’عالمی سطح پر پیٹرول کم‘ : تاجروں نے پیٹرولیم مصنوعات کی قیمتوں میں اضافے کو مسترد کردیا

تاجروں نے پیٹرولیم مصنوعات میں قیمتوں کے اضافے کی شدید مذمت کرتے ہوئے حکومت نے فیصلہ واپس لینے کا مطالبہ کیا ہے۔

مرکزی تنظیم تاجران پاکستان کے صدر کاشف چوہدری نے اپنے بیان میں کہا کہ پیٹرول کی قیمت میں کمی کے بجائے اضافہ کی شدید مذمت کرتے ہیں، عالمی سطح پر پٹرولیم کی قیمتوں میں کمی جبکہ پاکستان میں اضافہ حیران کن ہے۔

انہوں نے کہا کہ حکومت عوام اور انڈسٹری کو ریلیف دینے کے لیے تیار نہیں ہے، پیٹرولیم مصنوعات کی قیمتوں میں اضافہ افسوسناک اور شرمناک ہے۔

کاشف چوہدری نے کہا کہ پٹرول گیس اور بجلی کی قیمتوں کو کم نہ کرنے تک معیشت کا پہیہ نہیں چل سکتا۔

دوسری جانب جماعت اسلامی کے امیر حافظ نعیم نے پیٹرولیم مصنوعات کے قیمتوں میں اضافے کو شرمناک قرار دیا اور پرانی قیمتوں کو بحال رکھنے کا مطالبہ کردیا۔