عیدالاضحی، اسٹیٹ بینک کا 3 روزہ تعطیلات کا اعلان

کراچی: اسٹیٹ بینک آف پاکستان نے عیدالاضحی کے موقع پر ملک بھر میں تین روزہ عام تعطیلات کا اعلان کر دیا ،جس کے تحت مرکزی بینک 26 سے 28 مئی 2026 تک بند رہے گا۔

اسٹیٹ بینک کی جانب سے جاری اعلامیے کے مطابق عیدالاضحی کی تعطیلات کے باعث بینک دولت پاکستان کے تمام دفاتر منگل 26 مئی سے جمعرات 28 مئی تک بند رہیں گے، جبکہ اس دوران دفتری اور کاروباری سرگرمیاں بھی معطل رہیں گی۔

اعلامیے میں کہا گیا ہے کہ تعطیلات کے اختتام کے بعد اسٹیٹ بینک اور اس سے متعلقہ دفاتر 29 مئی بروز جمعہ سے معمول کے مطابق دوبارہ کھل جائیں گے، جہاں صارفین بینکنگ خدمات حاصل کر سکیں گے۔

مرکزی بینک نے تعطیلات کے اس شیڈول سے تمام کمرشل بینکوں، مالیاتی اداروں اور متعلقہ تنظیموں کو بھی آگاہ کر دیا ہے تاکہ عید کے موقع پر بینکاری امور کے حوالے سے پیشگی انتظامات کیے جا سکیں۔

ماہرین کے مطابق عیدالاضحی کی تعطیلات کے باعث شہریوں کی جانب سے اے ٹی ایم، آن لائن بینکنگ اور ڈیجیٹل ٹرانزیکشنز کے استعمال میں اضافہ متوقع ہے۔

 اس لیے صارفین کو ہدایت کی گئی ہے کہ وہ اپنی ضروری مالی لین دین تعطیلات سے قبل مکمل کر لیں تاکہ کسی ممکنہ دشواری سے بچا جا سکے۔