سردیوں کی آمد سے قبل ہی کراچی میں گیس کی بدترین لوڈشیڈنگ

کراچی :  سردیوں کی آمد سے قبل ہی کراچی میں گیس کی بدترین لوڈشیڈنگ کے باعث شہری لکڑیوں پر کھانا پکانے پر مجبور ہیں۔

کراچی میں سردیوں کی آمد سے قبل ہی گیس کی بدترین لوڈشیڈنگ جاری ہے، پی آئی بی کالونی اور گردونواح میں گزشتہ 20 روز سے جاری گیس کی لوڈشیڈنگ نے شہریوں کی روزمرہ زندگی مفلوج کر دی ہے۔

موسمِ سرما کی آمد سے قبل ہی چولہے ٹھنڈے پڑ گئے اور شہری لکڑیوں یا مہنگے سلینڈر استعمال کرکے گزارا کرنے پر مجبور ہوگئے ہیں۔

جہانگیر روڈ، جمشید کوارٹر، مارٹن کوارٹر اور پی آئی بی میں پانی و گیس کی بندش کے باعث عوام احتجاج پر مجبور ہیں اور "گیس دو، گیس دو کے نعرے لگا رہی ہیں۔

شہریوں کا کہنا ہے کہ گیس کے بل تو باقاعدگی سے آتے ہیں، لیکن مہینوں سے گیس فراہم نہیں کی گئی۔شہری مزید کہتے ہیں کہ یہ مناظر کسی دیہات کے نہیں بلکہ دو ہزار پچیس کے کراچی کے ہیں، جو ملکی خزانے کو ستر فیصد ریونیو دیتا ہے، مگر اس کے شہری بنیادی سہولیات سے محروم ہیں۔

مزید برآں عوامی نمائندوں پر شدید تنقید کی گئی ہے، جن میں قومی و صوبائی اسمبلی کے اراکین اور بلدیاتی نمائندے شامل ہیں، جو علاقے کے مسائل سے مکمل طور پر لاتعلق نظر آتے ہیں۔