وفاقی حکومت نے سولر صارفین پر عائد جنرل سیلز ٹیکس موخر کر دیا

کراچی: وفاقی حکومت نے سولر صارفین پر عائد جنرل سیلز ٹیکس عارضی طور پر موخر کر دیاہے۔وفاقی حکومت نے سولر سسٹم کے ذریعے بجلی پیدا کرنے والے صارفین پر نافذ کیے گئے 16 فیصد جنرل سیلز ٹیکس کو عارضی طور پر روک دیا ہے۔

 حکومت نے یہ فیصلہ سولر صارفین کی جانب سے دائر نظرثانی درخواست منظور ہونے کے بعد کیا۔ صدر مملکت نے سولر جی ایس ٹی سے متعلق اپیل منظور کرتے ہوئے کیس کو دوبارہ سماعت کے لیے وفاقی ٹیکس محتسب کو بھجوا دیا ہے۔

صدر نے ہدایت دیتے ہوئے کہا کہ وفاقی ٹیکس محتسب اس معاملے کی نئے سرے سے تفصیلی جانچ کرے۔بجلی کی تمام تقسیم کار کمپنیوں نے وفاقی ٹیکس محتسب کے فیصلے کے خلاف اپیل دائر کی تھی جس کے بعد سولر سسٹم استعمال کرنے والے صارفین پر ٹیکس نافذ کر دیا گیا تھا۔

اس ٹیکس کے نتیجے میں صارفین کو بھاری ادائیگیاں کرنا پڑ رہی تھیں جس پر شدید تشویش کا اظہار کیا جا رہا تھا۔

وفاقی ٹیکس محتسب نے رواں سال فروری میں ٹیکس وصولی کا حکم جاری کیا تھا، تاہم صدر مملکت نے رواں ماہ دائر کی گئی نظرثانی درخواست منظور کرتے ہوئے ٹیکس کے نفاذ پر نظرثانی اور نئے سرے سے سماعت کی منظوری دے دی۔