گاڑی چلانے والے غیر ضروری ہارن بجانے سے گریز کریں، سبینا فاروق

کراچی: پاکستان شوبز انڈسٹری کی خوبرو اداکارہ سبینا فاروق نے بڑی گاڑیوں کے مالکان کو اخلاقیات اور صبر کا درس دے دیا۔

سبینا فاروق نے حال ہی میں انسٹا گرام پرایک اہم سماجی پیغام شیئر کیا جس میں انہوں نے کہا ہے کہ اگر کسی کے پاس بڑی گاڑی ہے تو اس کا ظرف بھی بڑا ہونا چاہیے۔

 خاص طور پر موٹر سائیکل سواروں کے ساتھ جو اپنی فیملی کے ساتھ باہر نکلتے ہیں، ان کیساتھ حسن سلوک سے پیش آنا چاہیے۔

انہوں نے گاڑی چلانے والوں کو تنبیہ کی کہ وہ غیر ضروری ہارن بجانے سے گریز کریں کیونکہ اس سے بائیک پر سوار معصوم بچے خوفزدہ ہو سکتے ہیں۔

سبینا فاروق نے مزید کہا ہے کہ اگر کوئی بائیک سوار چند لمحوں کے لئے آپ کی لین میں آ جاتا ہے تو صبر و تحمل کا مظاہرہ کریں، جب تک کہ کوئی سنگین مسئلہ پیش نہ آئے۔