کراچی کے ویئر ہاؤس سے برآمد اربوں کی ادویات جعلی وغیر قانونی قرار

 کراچی: شہر قائد کے ویئر ہائوس سے برآمد اربوں کی ادویات کی جانچ پڑتال مکمل کرلی گئی، ویئر ہائوس سے برآمد شدہ ادویات جعلی، غیر قانونی نکلیں۔

ڈریپ ذرائع کے مطابق ویئر ہائوس سے ملنے والی ادویات جعلی و غیر قانونی ہیں، سنٹرل ڈرگ ٹیسٹنگ لیب کراچی نے ادویات کو جعلی قرار دیا ہے، ویئر ہاوس سے برآمد شدہ ادویات ڈریپ سے رجسٹرڈ نہیں ہیں۔

ذرائع نے بتایا کہ برآمد ادویات کے سیمپلز کو سنٹرل ڈرگ ٹیسٹنگ لیب کراچی بھجوایا گیا تھا، ویئر ہائوس سے 7 برانڈز کی درد کش ٹیبلٹ، کیپسول برآمد ہوئے تھے، ویئر ہاوس سے 7 بیچ نمبرز کی ادویات برآمد ہوئی تھیں، برآمد ادویات کے پیکٹ پر دواساز کمپنیز کی تفصیلات درج نہیں ہیں۔

ویئرہائوس سے ٹراما ڈول سالٹ سے تیار کردہ ادویات بھی برآمد ہوئی تھیں، ٹراما ڈول ہائیڈروکلورائیڈ سالٹ سے بننے والی دردکش دوا ہے، دردکش ادویات میں افیم کی معمولی آمیزش پائی جاتی ہے۔

ذرائع نے کہا کہ ویئرہائوس سے ٹرامیکنگ، ٹرامیکنگ میگا نامی گولیاں برآمد ہوئی تھیں، نیو ٹراماڈول 225 ایم جی گولیاں، ٹراماکنگ کیپسول برآمد ہوئے تھے، ویئرہائوس سے نیو رائل، ٹیمرال، ٹرامیکنگ نامی ٹیبلٹ برآمد ہوئی تھیں۔

کسٹم انفورسمنٹ نے 26 فروری کو کورنگی میں ویئرہاوس پر چھاپہ مارا تھا، کسٹم انفورسمنٹ نے ویئر ہاوس سے دس ارب کی ادویات برآمد کی تھیں، ویئرہاوس سے برآمد شدہ ادویات کو بھارتی قرار دیا گیا تھا، ادویات کو ملکی تاریخ کی سب سے بڑی اسمگلڈ کھیپ قرار دیا گیا تھا۔