محکمہ موسمیات نے کراچی میں سردی کی آمد کی خوشخبری سنادی

محکمہ موسمیات نے کراچی میں سردی کی آمد کی خوش خبری سنادی ہے۔

محکمہ موسمیات کا کہنا ہے کہ بلوچستان میں داخل ہونے والے مغربی ہواوں کے سلسلے کے اثرات شہرپر نمودار ہوبا شروع ہوگئے، اتوار کی صبح کم سے کم درجہ حرارت گزشتہ روز کے مقابلے میں 2.7 ڈگری کمی سے 17.7 ڈگری سینٹی گریڈ ریکارڈ ہوا۔

محکمہ موسمیات کے مطابق 5 دسمبر سے بلوچستان میں داخل ہونے والے مغربی سلسلے کے ممکنہ اثرات 5 دسمبر سے یخ بستہ ہواوں کے سبب صبح و رات کے درجہ حرارت میں 2 سے3 ڈگری کمی متوقع ہے۔

محکمہ موسمیات ارلی وارننگ سینٹر کی پیش گوئی کے مطابق آج(پیر)سے شہر پر بلوچستان کی ہوائیں اثرانداز ہونے کے سبب معتدل موسم کے ساتھ خنک راتیں متوقع ہیں جبکہ منگل کو شہر میں معمول سے تیز ہوائیں چل سکتی ہیں، یخ بستہ موسم کے دوران کم سے کم پارہ 17 ڈگری تک گرسکتا ہے،

اس دوران شہر کا زیادہ سے زیادہ درجہ حرارت 29 تا 31ڈگری سینٹی گریڈ کے درمیان ریکارڈ ہوسکتا ہے۔