طیارے میں بم ہے! ماں کا بیٹے کو گرل فرینڈ کے ساتھ جانے سے روکنے کیلئے انوکھا اقدام

ایک ماں نے بنگلادیش میں جہاز میں سوار بیٹے کو گرل فرینڈ کے ساتھ نیپال جانے سے روکنے کے لیے طیارے میں بم کی جھوٹی اطلاع دے دی۔

غیر ملکی ذرائع ابلاغ کے مطابق بنگلادیشی ائیرٹریفک حکام کو فون پر اطلاع دی گئی کہ ڈھاکا سے نیپال جانے  والی بنگلادیش کی سرکاری  ائیرلائن بیمان  میں بم ہے۔

رپورٹس کے مطابق بم کی اطلاع پر قانون نافذ کرنے والے ادارے حرکت میں آگئے اور  فوری طور  پر  پرواز کو  روک دیا  گیا، جس کے بعد تین گھٹنے تک جہاز کی تلاشی لی گئی تاہم کچھ نہ ملا اور  پرواز کو کلیئرنس ملی تو جہاز  مسافروں کو  لیکر  نیپال کے دارالحکومت کھٹمنڈو  پہنچ گیا۔

 بنگلادیشی میڈیا کے مطابق قانون نافذکرنے والے اداروں نے کالر کی شناخت کا عمل شروع کیا اور تحقیقات کے بعد معلوم ہوا کہ  ماں نے اپنے شادی شدہ بیٹیکو گرل فرینڈ کے ساتھ نیپال جانے سے روکنے کے لیے طیارے میں بم کی جھوٹی اطلاع دی تھی۔

جھوٹی اطلاع دینے والی خاتون اور ان کی بہو کو اطلاع ملی تھی کہ ان بیٹا اپنی گرل فرینڈ کے ساتھ کٹھمنڈو جا رہا ہے، اسے روکنے کے لیے خاتون نے بیٹے کے دوست کے مشورے پر طیارہ  روکنے کے لیے بم کی جھوٹی اطلاع دی، تاہم جہاز تین گھنٹے کی تاخیر کے بعد خاتون کے بیٹے اور اس کی گرل فرینڈ سمیت دیگر مسافروں کو لیکر کھٹمنڈو پہنچ گیا۔

پولیس نے مسافر کی والدہ، اہلیہ اور دوست کو گرفتار کرلیا ہے اور ان کے خلاف قانونی کارروائی کی جارہی ہے۔