عروہ اور فرحان سعید نے علیحدگی کی خبروں کی تصدیق کردی

اداکارہ عروہ حسین اور گلوکار و اداکار فرحان سعید نے بالآخر ماضی میں پھیلنے والی علیحدگی کی افواہوں کی تصدیق کر دی ہے۔

دونوں اداکاروں نے ایک حالیہ انٹرویو میں اپنے رشتے کے اتار چڑھاؤ اور مشکلات کا ذکر کرتے ہوئے بتایا کہ وہ ایک مشکل دور سے گزرے ہیں، لیکن خاندانوں کی مدد اور باہمی تعاون سے اس مرحلے کو عبور کرنے میں کامیاب رہے۔

فرحان سعید نے کہا کہ ان کی شادی میں ایک ایسا وقت بھی آیا جب رشتہ تکلیف دہ دور سے گزر رہا تھا تاہم، دونوں خاندانوں نے ان کا ساتھ دیا اور انہیں درست رہنمائی کی۔

فرحان سعید نے زور دے کر کہا کہ کسی بھی رشتے میں احترام اور عزت بنیادی اہمیت رکھتے ہیں، اور یہی وہ چیز تھی جس نے ان کے تعلق کو برقرار رکھا۔

انہوں نے یہ بھی واضح کیا کہ چاہے شادی میں کتنے ہی مسائل کیوں نہ آئے، انہوں نے یا عروہ نے کبھی بھی عوامی سطح پر ایک دوسرے کے خلاف کچھ نہیں کہا۔

فرحان نے بتایا کہ ہر رشتے میں اتار چڑھاؤ آتے ہیں، لیکن انہوں نے ایک دوسرے کو وقت دیا اور ماضی کے تلخ تجربات کو بھلا کر دوبارہ ایک ساتھ جڑ گئے۔

عروہ اور فرحان نے اپنے مداحوں کو مشورہ دیا کہ وہ اپنے ہمسفر کی عزت کریں اور اپنے معاملات کو باہمی گفت و شنید سے حل کریں۔

انہوں نے کہا کہ کسی کے سامنے اپنے ساتھی کی برائی کرنا کسی بھی رشتے کو مشکل میں ڈال سکتا ہے۔

یاد رہے کہ کچھ عرصہ قبل عروہ حسین اور فرحان سعید کی علیحدگی کی افواہیں سوشل میڈیا پر گرم تھیں۔ تاہم، دونوں دوبارہ ایک ساتھ نظر آئے، اور ان کے ہاں پہلے بچے کی پیدائش کے بعد یہ افواہیں ختم ہو گئیں۔

اب دونوں نے اپنے تجربات شیئر کر کے نہ صرف اپنے رشتے کی مضبوطی کو اجاگر کیا ہے، بلکہ اپنے مداحوں کو بھی رشتوں میں باہمی احترام اور برداشت کی اہمیت کا پیغام دیا ہے۔