بھارت کے 70 سالہ اداکار کے 31 سالہ ہیروئن کے ساتھ تعلقات

بالی ووڈ کے ماضی کے مشہور 70 سالہ اداکار 31 سالہ اداکارہ کی محبت میں گرفتار ہوگئے ہیں۔

بھارتی میڈیا کے مطابق  اداکار گووند نام دیو کے خود سے 39 سال کم عمر لڑکی کے ساتھ تعلقات کی خبریں زیر گردش ہیں اور انہیں 31 سالہ اداکارہ شیوانگی ورما کے ساتھ جوڑا جارہا ہے۔

معاملہ اُس وقت شروع ہوا جب شیوانگی نے سوشل میڈیا پر 70 سالہ اداکار گووند کے ساتھ ایک تصویر شیئر کرتے ہوئے لکھا کہ ’محبت کی کوئی عمر نہیں ہوتی۔‘

یہ پوسٹ جنگل کی آگ کی طرح پھیل گئی اور وائرل ہونے کے بعد ان کے تعلقات کے بارے میں چہ مگوئیاں شروع ہوگئیں۔ تاہم اب گووند نام دیو نے ان خبروں پر ردعمل دیتے ہوئے واضح کیا کہ ان کا شیوانگی ورما کے ساتھ تعلق صرف پیشہ ورانہ ہے کیونکہ وہ ایک ایسے پراجیکٹ پر کام کر رہے ہیں جس میں ایک زائد العمر شخص کو ایک کم عمر نوجوان لڑکی سے محبت ہوگئی ہے۔

اداکار نے اسی تصویر کو دوبارہ شیئر کرتے ہوئے کہا کہ ان کی بیوی سودھا نام دیو ہی ان کی زندگی ہیں اور وہ ان کے علاوہ کسی اور سے محبت نہیں کرتے۔

گووند نے مزید وضاحت کی کہ یہ افواہیں ایک فلم کے پلاٹ کا حصہ ہیں۔ گووند نے اپنی پوسٹ میں لکھا: ’ یہ حقیقی زندگی نہیں ہے، میری زندگی میں صرف سودھا (بیگم) ہی اہم ہیں۔ وہ میری سانس ہیں، اور دنیا کی کوئی بھی دولت ان کے برابر نہیں ہوسکتی۔‘