بھارتی اداکار نے رمضان میں عمرہ کی سعادت حاصل کرلی

معروف بھارتی ٹی وی اور فلم اداکار علی گونی نے رمضان المبارک کے مقدس مہینے میں عمرے کی سعادت حاصل کی۔

انہوں نے اپنے انسٹاگرام اکاؤنٹ پر خانہ کعبہ کی تصاویر اور ویڈیوز شیئر کیں، جو سوشل میڈیا پر تیزی سے وائرل ہوگئیں۔ ایک تصویر میں علی گونی خانہ کعبہ کے سامنے کھڑے نظر آ رہے ہیں، جبکہ دوسری تصویر میں انہوں نے عمرہ ادائیگی کے بعد سنت کے مطابق اپنے سر کے بال منڈوا لیے۔

اداکار نے بتایا کہ گنجا ہونا اُن کی زندگی کا پہلا تجربہ ہے۔

علی گونی نے تصویر کے ساتھ کیپشن میں حدیث مبارک کا حوالہ دیتے ہوئے لکھا، "حضرت محمد صلی اللہ علیہ وسلم کے فرمان کے مطابق رمضان میں عمرہ کرنا حج کے برابر ہے۔"

انہوں نے مزید کہا کہ "میرا عمرہ حج کے برابر ہے، اور یہ اسلامی لحاظ سے بہت اہمیت رکھتا ہے، کیونکہ رمضان المبارک میں عمرے کی فضیلت بہت زیادہ ہے۔"

علی گونی کے مداحوں اور انسٹاگرام صارفین نے انہیں عمرے کی سعادت حاصل کرنے پر مبارکباد دی اور ان کے لیے نیک تمناؤں کا اظہار کیا۔