دنانیر کی احد رضا سے شادی؟ وضاحت سامنے آگئی

ٹک ٹاکر اور اداکارہ دنانیر مبین نے اداکار احد رضا میر سے شادی کی افواہوں پر خاموشی توڑ دی ہے۔

 انہوں نے واضح کیا کہ دونوں کے درمیان کوئی رومانوی تعلق نہیں، بلکہ وہ صرف پیشہ ورانہ اور دوستانہ تعلقات رکھتے ہیں۔  

دنانیر اور احد رضا میر کو ان کے ڈرامے "میم سے محبت" کی کامیابی اور اسکرین کیمسٹری کی وجہ سے اکثر ایک جوڑے کے طور پر دیکھا جاتا ہے۔ تاہم، دنانیر نے ایک انٹرویو میں اس بات کی تردید کرتے ہوئے کہا کہ وہ صرف ایک دوسرے کے ساتھ کام کرتے ہیں اور ان کی ذاتی زندگی الگ ہے۔  

حال ہی میں، جب دنانیر نے گریجویشن مکمل کی تو احد رضا میر کے والد آصف رضا میر نے انہیں مٹھائی کا تحفہ دیا۔ اسی دوران ڈرامے کے سیٹ پر احد رضا میر نے دنانیر کو نوٹوں کا ہار پہنایا، جس کی ویڈیو وائرل ہوئی اور کئی لوگوں نے اسے شادی کی علامت سمجھ لیا۔  

دنانیر نے وضاحت کرتے ہوئے کہا کہ یہ صرف ایک چھوٹا سا جشن تھا اور احد رضا میر کی والدہ نے بھی ان کے لیے گھر سے کھانا بھیجا تھا۔

 انہوں نے مداحوں سے درخواست کی کہ وہ ان کی ذاتی زندگی کو ان کے کرداروں سے الگ رکھیں اور ان کی پرائیویسی کا احترام کریں۔  

ان کا کہنا تھا کہ "میں ایک اداکارہ ہوں، اور میرے کردار کو پسند کرنے کے لیے مداحوں کا شکریہ، لیکن میری اصل زندگی میرے ڈراموں سے بالکل مختلف ہے۔"

دنانیر نے زور دے کر کہا کہ ناظرین کو چاہیے کہ وہ اداکاروں کی ذاتی زندگی میں دخل اندازی کرنے کے بجائے ان کے فن کو سراہیں۔