فلسطین فلسطینیوں کا رہے گا کوئی طاقت نہیں چھین سکتی، بیلا حدید

مشہور ماڈل بیلا حدید نے غزہ سے متعلق ٹرمپ کے منصوبے کو مسترد کرتے ہوئے فلسطینیوں کیلیے اُن کی سرزمین کی ضرورت پر زور دیا۔

سپر ماڈل بیلا حدید نے اپنی انسٹاگرام پوسٹ میں فلسطینیوں کے اپنی زمین سے گہرے تعلق کی تصدیق کی۔ انہوں نے غزہ کے لیے امریکی صدر ڈونلڈ ٹرمپ کے متنازعہ منصوبے کی روشنی میں فلسطینیوں سے ان کی شناخت چھیننے کی کسی بھی کوشش کو واضح طور پر مسترد کردیا۔

انہوں نے پوسٹ میں تربوز کی طرح پینٹ کیے گئے ہاتھ کی تصویر پر یہ الفاظ لکھ کر شیئر کیے کہ "فلسطین ہمیشہ فلسطینیوں کا رہے گا اور اسے دنیا کی کوئی طاقت ختم نہیں کرسکتی‘۔

انہوں نے لکھا کہ "زمین میں جڑیں، ہمارے خون میں جڑیں، ہمارے دلوں کی جڑیں، فلسطینی ثقافت کی جڑیں، خون کی لکیریں، اور تاریخ — یہ گہری جڑیں ہیں۔ ایسی جڑیں جنہیں کوئی بھی کبھی نہیں چھین سکتا۔ چاہے طاقت، پیسہ یا شخص کوئی بھی ہو،" 

سپر ماڈل نے فلسطینیوں کی حالت زار پر روشنی ڈالی، جو ظلم، بھوک، بیماری اور خونریزی کو برداشت کر رہے ہیں، یہ کہتے ہوئے کہ وہ ایسی آزمائش کے مستحق نہیں ہیں۔

انہوں نے کہا، "ہمارے لوگ — میرے آباؤ اجداد — اور اس وقت اس ہولناکی سے متاثر فلسطینی، نہ صرف غزہ بلکہ مغربی کنارے میں بھی، بنیادی انسانی حقوق کے مستحق ہیں۔"

انہوں نے مزید زور دیا کہ فلسطینیوں کو "اپنے آباؤ اجداد کی سرزمین سے جڑے رہنے" کا حق حاصل ہونا چاہیے اور وہ ایسی جگہ پر وقار کے ساتھ رہنے کی آزادی کے مستحق ہیں جہاں ان کے خاندان، ثقافت اور ذریعہ معاش کی جڑیں گہری ہیں۔

انہوں نے مزید کہا، "انہیں خوف، ذلت، یا قبضے میں نہیں رہنا چاہیے۔"