گلوکار سلمان احمد کے خلاف پیکا ایکٹ کا مقدمہ درج

پاکستان تحریک انصاف کے حامی اور نامور گلوکار سلمان احمد کے خلاف پیکا ایکٹ کے تحت لاہور میں مقدمہ درج کرلیا گیا ہے۔

تفصیلات کے مطابق سلمان احمد کے خلاف لاہور کے تھانہ ڈیفنس اے میں مقدمہ پولیس افسر کی مدعیت میں درج کیا گیا ہے۔

مقدمے میں سلمان احمد پر الزام عائد کیا گیا ہے کہ گلوکار نے سوشل میڈیا پر قومی سلامتی کے اداروں اور ریاست کے خلاف پروپیگنڈا کیا اور اس کی تشہیر بھی کی۔

ایف آئی آر میں لکھا گیا ہے کہ سلمان احمد کے سماجی رابطے کی ویب سائٹ ایکس پر 2 لاکھ 65 ہزار سے زائد فالوورز ہیں، جس کے سامنے انہوں نے قومی اداروں کے خلاف سوشل میڈیا پر پروپیگینڈا کیا۔

ایف آئی آر کے مطابق سلمان احمد نے سوشل میڈیا پر نفرت انگیز پوسٹ کو وائرل کیا جس کو پولیس کے ڈیوٹی پر تعینات افسر نے خود دیکھا۔

واضح رہے کہ گلوکار طویل عرصے سے امریکا میں مقیم ہیں اور وہ وہاں بیٹھ کر سوشل میڈیا کا استعمال کرتے ہیں۔ اُن کی بیشتر ٹویٹس، پوسٹس میں بانی پی ٹی آئی یا تحریک انصاف کے بیانیے کا پرچار نظر آتا ہے۔