حمیرہ اصغر کی موت: تفتیش میں نیا اور اہم موڑ سامنے آتے ہی افواہیں دم توڑ گئیں

کراچی: ماڈل و اداکارہ حمیرہ اصغر کی پراسرار موت کے معاملے میں ایک نیا ڈرامائی موڑ سامنے آیا ہے۔ 

تفتیش کاروں نے اہم شواہد حاصل کیے ہیں جس کے مطابق مرحومہ اداکارہ اپنی موت کے وقت مالی مشکلات کا شکار نہیں تھیں، جو کہ اس کیس کے ابتدائی مفروضوں کو غلط ثابت کرتا ہے۔

ذرائع کے مطابق، حمیرہ کے نام پر ایک نجی بینک میں موجود کرنٹ اکاؤنٹ سے 3 لاکھ 98 ہزار روپے سے زائد کی رقم برآمد ہوئی ہے۔ 

اکاؤنٹ کی سرگرمیوں سے پتہ چلتا ہے کہ باقاعدگی سے 25 ہزار سے 50 ہزار روپے تک کی اے ٹی ایم سے ٹرانزیکشن ہوتی رہی ہیں، جو اس بات کی نشاندہی کرتی ہے کہ ان کے پاس اکاؤنٹ مین پیسے مستقل رہتے تھے۔

 یہ انکشاف اس قیاس آرائی کو کمزور کرتا ہے کہ مالی پریشانی نے حمیرہ کو کسی مایوسی کی جانب دھکیلا ہوگا۔

یہ نیا موڑ اس کیس میں ایک اہم پیش رفت ہے، جس نے رواں ماہ کراچی میں حمیرہ کی نو ماہ پرانی گل سڑی لاش ان کے اپارٹمنٹ سے ملنے کے بعد سے عوام کی توجہ اپنی جانب مبذول کرائی ہوئی ہے۔

اس پیشرفت کے بعد سوشل میڈیا پر قیاس آرائیوں کی ایک لہر دوڑا دی تھی، جہاں لوگ ان کی موت کے حالات کے بارے میں سوالات اٹھا رہے تھے۔

پولیس نے تصدیق کی ہے کہ حمیرہ کے گھر سے نہ تو کوئی نقدی ملی اور نہ ہی زیورات، جس کے باعث حکام اب چوری یا کسی سازش کو ان کی موت کا ممکنہ سبب سمجھ رہے ہیں۔ اس زاویے کو اب باضابطہ طور پر جاری تفتیش کا حصہ بنا لیا گیا ہے۔

پولیس اس وقت ملحقہ علاقوں کی سی سی ٹی وی فوٹیج کا جائزہ لے رہی ہے اور اپارٹمنٹ سے فرانزک شواہد اکٹھے کر رہی ہے تاکہ اداکارہ کی زندگی کے آخری لمحات کی بازسازی کی جا سکے۔

پولیس کا کہنا ہے کہ تفتیش ابھی جاری ہے اور حکام نے عوام سے اپیل کی ہے کہ اگر کوئی اس سلسلے میں معلومات رکھتا ہے تو وہ سامنے آئے۔