نیلم منیر کی شوبز چھوڑنے کی خبروں پر وضاحت سامنے آگئی

اداکارہ نیلم منیر کی کچھ عرصہ قبل شادی ہوئی ہے، تاہم اداکارہ نے اب شوبز چھوڑنے کی خبروں پر وضاحت دے دی۔

اداکارہ نے رواں برس 3 جنوری کو نکاح کی تصاویر شیئر کرتے ہوئے شادی کی تصدیق کی تھی، بعد ازاں ان کی شادی کی دیگر تقریبات کی ویڈیوز بھی سامنے آگئیں تھیں۔

نیلم کی شادی کی تقریبات متحدہ عرب امارات (یو اے ای)کی ریاست دبئی میں ہوئیں جب کہ بعض تقریبات کراچی میں بھی ہوئی تھیں لیکن اس حوالے سے اداکارہ نے کوئی وضاحت سامنے نہیں آئی تھی۔

میڈیا رپورٹس اور شوبز شخصیات کے مطابق نیلم منیر نے پاکستانی نژاد کاروباری شخص محمد راشد سے شادی کی۔

بعد ازاں 27 جنوری کو انسٹاگرام پر نیلم منیر نے اپنی تصویر شیئر کرتے ہوئے کام پر واپسی کا اعلان کیا تھا اور اب اُن کی شوبز چھوڑنے کی خبروں پر وضاحت سامنے آئی ہے۔

اداکارہ نے انسٹاگرام اسٹوری میں لکھا کہ ان سے متعلق افواہیں پھیلائی جا رہی ہیں کہ شادی کے بعد انہوں نے شوبز چھوڑ دیا ہے۔

نیلم نے لکھا کہ انہوں نے کچھ عرصہ قبل شادی کی ہے لیکن وہ شوبز چھوڑنے کا سوچ بھی نہیں سکتی، شوبز میں کام کرنا ان کا شوق اور جذبہ ہے اور اس میں کام کیے بغیر نہیں رہ سکتیں۔