طلاق کے معاملے پر گووندا کی اہلیہ کا حیران کن بیان

بھارتی فلم انڈسٹری کے معروف اداکار گووندا کی اہلیہ سنیتا آہوجا نے طلاق کی افواہوں پر خاموشی توڑتے ہوئے واضح کیا کہ وہ اور گووندا علیحدہ نہیں ہوئے ہیں۔

سنیتا نے اپنے تازہ بیان میں ان افواہوں کو مسترد کرتے ہوئے کہا کہ یہ صرف قیاس آرائیاں ہیں اور ان کی شادی مکمل طور پر مستحکم ہے۔

سنیتا آہوجا نے کہا کہ "دنیا میں ایسا کوئی بھی مائی کا لال نہیں ہے جو مجھے اور گووندا کو جدا کر سکے اور اگر کوئی ہے تو سامنے آکر دکھائے۔"

انہوں نے تصدیق کی کہ وہ اور گووندا علیحدہ رہ رہے ہیں، لیکن اس کا مطلب یہ نہیں کہ وہ علیحدہ ہو گئے ہیں۔

سنیتا نے بتایا کہ جب گووندا نے سیاست میں قدم رکھا تھا، تو ان کی بیٹی بڑی ہو رہی تھی اور گھر میں سیاسی پارٹی کے رہنما اور کارکنان کی آمد و رفت بڑھ گئی تھی، گووندا کو اپنی سیاسی مصروفیات کی وجہ سے رات گئے تک میٹنگز کرنا پڑتی تھیں، جس کی وجہ سے انہوں نے اپنے گھر کے سامنے ایک اور بنگلہ خرید لیا تھا۔

سنیتا نے وضاحت کی کہ بچوں کو اسکول جانا ہوتا تھا، اس لیے رات دیر ہونے پر گووندا سامنے والے بنگلے میں ہی سو جاتے تھے، جو اب ان کا دفتر بھی ہے۔

سنیتا نے کہا کہ گووندا کو زیادہ باتیں کرنے اور محافل جمائے رکھنے کی عادت ہے، جبکہ وہ خود ایسی محفلوں سے دور رہتی ہیں کیونکہ وہ زیادہ باتیں کرنے کو توانائی کا ضیاع سمجھتی ہیں۔

انہوں نے مزید کہا کہ جب سے دفتر اور گھر علیحدہ ہوئے ہیں، وہ اور ان کی بیٹی اپنی مرضی کے کپڑے پہن کر گھر میں آزادی سے گھومتی ہیں۔ سنیتا نے کہا کہ "بس اتنی سی بات ہے کہ ہم الگ الگ گھروں میں رہ رہے ہیں، لیکن لوگوں نے رائی کا پہاڑ بنا دیا۔" انہوں نے زور دے کر کہا کہ ان کی شادی مکمل طور پر مستحکم ہے اور ان کے درمیان کوئی دوریاں نہیں ہیں۔

یاد رہے کہ گووندا اور سنیتا آہوجا نے مارچ 1987 میں خفیہ شادی کی تھی، اور 1988 میں اپنی بیٹی کی پیدائش کے بعد انہوں نے اپنی شادی کو عوامی سطح پر ظاہر کیا تھا۔ اس جوڑے کی شادی کو تین دہائیوں سے زیادہ عرصہ گزر چکا ہے، اور وہ ایک مضبوط رشتے کے ساتھ ساتھ ایک بیٹی کے والدین بھی ہیں۔

سنیتا آہوجا کے اس بیان نے طلاق کی افواہوں کو مکمل طور پر ختم کر دیا ہے، اور انہوں نے اپنے رشتے کی مضبوطی کو ایک بار پھر ثابت کر دیا ہے۔