پاکستان میں پولیو کے مزید دو کیسز رپورٹ

بلوچستان اور خیبرپختونخوا کے دو اضلاع میں پولیو کے دو نئے کیسز رپورٹ ہوئے ہیں جس کے بعد رواں سال سامنے آنے والے کیسز کی تعداد 23 تک پہنچ گئی۔

قومی ادارہ برائے صحت کے مطابق خیبرپختونخوا کے ضلع کوہاٹ میں 10 ماہ کی بچی کو پولیو کی تشخیص ہوئی جس کے بعد رواں سال صوبے سے سامنے آنے والے کیسز کی تعداد 2 ہوگئی۔

اس کے علاوہ بلوچستان کے ضلع پشین میں 30 ماہ کے بچے کو پولیو وائرس کی قسم وی پی وی 1 کی تصدیق ہوئی جس کے بعد صوبے میں رپورٹ ہونے والے کیسز کی تعداد 15 تک پہنچ گئی۔

قومی ادارہ برائے صحت کا کہنا ہے کہ پولیو وائرس کا تیزی سے پھیلاؤ بچوں کی صحت کے لیے مستقل خطرہ ہے، بچوں کو پولیو ویکسین کے ساتھ ساتھ حفاظتی ٹیکہ جات کا کورس بھی بروقت مکمل کروائیں۔