راولپنڈی میں ڈینگی وائرس پھیلنے کا خدشہ، اسپتال سے لاروا برآمد

ایک سال سے زائد عرصے سے مرمتی کام کی وجہ سے بند راولپنڈی کے ہولی فیملی اسپتال کی عمارت سے بڑے پیمانے پر ڈینگی لاروا برآمد ہوا ہے جس کے بعد ڈینگی بڑے پیمانے پر پھیلنے کا تھریٹ الرٹ جاری کردیا گیا۔

تفصیلات کے مطابق ہولی فیملی اسپتال کو مرمتی کام کے بعد تیس جون کو آپریشنل کیا جانا ہے، اس سے قبل جب عمارت کی انسپیکشن ہوئی تو وہاں سے ڈینگی وائرس کے بڑے پیمانے پر شواہد ملے ہیں۔

شواہد ملنے کے بعد انتظامیہ نے انہیں تلف کرکے افزائش روک دی تاہم کسی بھی ممکنہ خطرے کے پیش نظر ڈینگی کا الرٹ جاری کردیا گیا جس میں وائرس پھیلنے کا خدشہ اور احتیاطی تدابیر اختیار کرنے کی ہدایت کی گئی ہے۔

ضلعی ہیلتھ اتھارٹی کی جانب سے جاری اعلامیے میں کہا گیا ہے کہ شہری گھروں کے قریب میٹھا پانی جمع نہ ہونے دیں اور خود بھی مچھر کش کریم یا لوشن استعمال کریں، بخار کی صورت یا ڈینگی علامات پر فوری ڈاکٹرز سے رجوع کریں۔