بل بل پاکستان گانا بنانے والے یوٹیوبر رات گئے لاہور سے اغوا

یوٹیوب کی مزاحیہ ویڈیوز اور پیروڈیز بنانے والے یوٹیوبر عون علی کھوسہ کو نامعلوم سادہ لباس اہلکار اغوا کر کے نامعلوم مقام پر لے گئے ہیں۔

معروف یوٹیوبر عون علی کھوسہ کو ان کے اہل خانہ کے مطابق جمعرات کو لاہور میں ان کی رہائش گاہ سے نامعلوم افراد اٹھا کر لے گئے۔ اس پیش رفت کو لاپتہ شخص کے بھائی علی شیر کھوسہ نے مائیکروبلاگنگ سائٹ ایکس پر شیئر کیا۔

خاندان کے ایک فرد کے مطابق، سادہ کپڑوں میں کچھ نامعلوم مسلح افراد نے جمعرات کی رات کو انہیں فلیٹ سے زبردستی اغوا کیا اور اپنے ہمراہ لے گئے۔ 

بھائی نے لکھا کہ عون کی غیر قانونی حراست کے خلاف آپ لوگ آواز اٹھائیں اور اُن کی واپسی و صحت یابی کیلیے دعا بھی کریں۔

یہ اغوا کھوسہ کے ایک پیروڈی گانا بل بل پاکستان کے ریلیز ہونے کے چند دن بعد ہوا ہے۔ گانے میں، کھوسہ نے وزیر اعظم شہباز شریف کی قیادت والی حکومت کو عوام پر بجلی کے بے تحاشا بلوں اور ٹیکسوں کا بوجھ ڈالنے پر تنقید کا نشانہ بنایا۔

Bill Bill Pakistan