ارشد چائے والا افغان ہے یا پاکستانی؟ عدالت نے حتمی فیصلہ سنادیا

لاہور ہائیکورٹ راولپنڈی بینچ نے مشہور چائے والے ارشد خان کے حق میں اہم فیصلہ سناتے ہوئے ان کو پاکستانی قرار اور شناختی کارڈ بحال کرنے کا حکم دے دیا۔

عدالتی احکامات کے بعد نادرا نے ارشد خان کا شناختی کارڈ دوبارہ فعال کر دیا جبکہ ویریفکیشن بورڈ نے تصدیق کی ہے کہ ارشد خان اور ان کا خاندان پاکستانی شہریت رکھتے ہیں۔

ارشد خان کے وکیل عمر اعجاز گیلانی نے بتایا کہ نادرا کے ویریفکیشن بورڈ نے مکمل جانچ پڑتال کے بعد واضح کر دیا کہ ان کے مؤکل اور ان کے اہلِ خانہ پاکستانی شہری ہیں۔

عدالت نے اپنے فیصلے میں کہا کہ کسی بھی شہری کا شناختی کارڈ یا پاسپورٹ بلاک کرنا آئینی حقوق کی خلاف ورزی کے مترادف ہے۔

عدالت نے درخواست گزار کی استدعا منظور کرتے ہوئے کیس کو نمٹا دیا۔

یاد رہے کہ کچھ عرصہ قبل نادرا نے ارشد خان چائے والے کا شناختی کارڈ اور پاسپورٹ بلاک کر دیا تھا، جس کے بعد انہوں نے عدالت سے رجوع کیا تھا۔