سال 2025 کے دوران تنازعات کا شکار ہونے والی شخصیات

پاکستانی شوبز شخصیات عموماً اپنی نجی زندگی کو پردے میں رکھنا پسند کرتی ہیں، مگر کچھ ستارے ایسے بھی ہوتے ہیں جو اپنی سرگرمیاں کھل کر عوام کے سامنے لے آتے ہیں۔

شہرت کے ساتھ تنقید اور تنازعات کا جُڑ جانا ایک فطری عمل ہے، اسی لیے جو لوگ عوامی زندگی اختیار کرتے ہیں، انہیں اپنے فیصلوں اور بیانات پر ردِعمل کا سامنا بھی کرنا پڑتا ہے۔

سال 2025 میں بھی کئی معروف پاکستانی شخصیات مختلف تنازعات کی وجہ سے خبروں میں رہیں۔

عتیقہ اوڈھو

پاکستانی ڈرامہ انڈسٹری کی سینئر اداکارہ عتیقہ اوڈھو سال بھر خبروں میں رہیں۔ بطور جج پروگرام کیا ڈراما ہے میں ان کے بیانات سوشل میڈیا پر مسلسل تنقید کی زد میں رہے۔ کبھی علی رضا کے حلیے پر تبصرہ، تو کبھی دانش تیمور کے ساتھ بطور ہیروئن کام کرنے کی خواہش، ان کے بیانات نے بحث کو جنم دیا۔ تاہم عتیقہ اوڈھو اپنے مؤقف پر ڈٹی رہیں۔

نادیا خان

اداکارہ اور میزبان نادیا خان بھی 2025 میں اپنے بیانات کے باعث متنازع رہیں۔ کیا ڈراما ہے میں ڈراموں پر تنقید کے دوران کئی بار ان کے الفاظ سوشل میڈیا صارفین کو ناگوار گزرے۔ یاسر حسین کے ساتھ لفظی جنگ اور پھر گلوکار طلحہ انجم سے مارننگ شو میں سخت سوالات پر انہیں شدید ردِعمل کا سامنا کرنا پڑا۔

ہانیہ عامر

نئی نسل کی سپر اسٹار ہانیہ عامر سوشل میڈیا پر سب سے زیادہ فالو کی جانے والی اداکارہ ہیں۔ 2025 میں وہ مختلف وجوہات کی بنا پر زیرِ بحث رہیں۔ بھارتی پنجابی فلم میں شمولیت سے لے کر عاصم اظہر کے ساتھ مبینہ صلح تک، ان کی نجی زندگی خبروں کا مرکز بنی رہی۔ بعض صارفین نے ان کے بدلتے ہوئے حلیے پر بھی سوالات اٹھائے۔

رجب بٹ

2025 کا سب سے متنازع یوٹیوبر اگر کسی کو کہا جائے تو وہ رجب بٹ ہوں گے۔ خاندانی وی لاگز بنانے والے رجب بٹ اس سال قانونی معاملات، جوئے کی ایپس کیس، ملک چھوڑنے کی خبریں اور ازدواجی مسائل کے باعث مسلسل سرخیوں میں رہے۔ سوشل میڈیا پر ان کی ذاتی زندگی کھل کر زیرِ بحث رہی۔

ڈکی بھائی (سعد الرحمن)

یوٹیوبر ڈکی بھائی کے لیے 2025 ایک مشکل سال ثابت ہوا۔ اچانک گرفتاری، طویل حراست اور مبینہ تشدد نے ان کے مداحوں کو چونکا دیا۔ رہائی کے بعد انہوں نے اپنے ساتھ ہونے والے سلوک کا ذکر کیا، جس پر عوام میں ہمدردی اور غم و غصہ دونوں دیکھنے میں آئے۔

عاطف اسلم

پاکستان کے عالمی شہرت یافتہ گلوکار عاطف اسلم ہمیشہ تنازعات سے دور رہے، مگر 2025 ان کے لیے بھی آزمائش لے کر آیا۔ پاک بھارت کشیدگی کے دوران غیر جانبدار مؤقف اختیار کرنے پر انہیں تنقید کا سامنا کرنا پڑا۔ اس کے علاوہ والد کے انتقال کے اگلے دن کنسرٹ کرنے پر بھی سوشل میڈیا پر مختلف آرا سامنے آئیں۔

فواد خان

اداکار اور گلوکار فواد خان پہلی بار شدید عوامی تنقید کی زد میں آئے۔ سیریز برزخ میں شرکت اور اس کے موضوعات پر مداحوں نے ناراضی کا اظہار کیا۔ پاک بھارت حالات پر غیر جانبدار بیان اور پاکستان آئیڈل میں بطور جج شرکت بھی بحث کا باعث بنی۔

طلحہ انجم

مقبول ریپر طلحہ انجم بھی 2025 میں تنازع کا حصہ بنے جب اسٹیج پر بھارتی پرچم لہرانے کی ویڈیوز وائرل ہوئیں۔ بھارت کی جانب سے پاکستان مخالف بیانیے کے تناظر میں ان کے اس عمل پر شدید ردِعمل سامنے آیا۔

عاصم اظہر

گلوکار عاصم اظہر کے لیے پیشہ ورانہ طور پر سال کامیاب رہا، مگر ذاتی زندگی خبروں میں رہی۔ منگنی ٹوٹنے اور ہانیہ عامر کے ساتھ دوبارہ تعلقات کی افواہوں نے انہیں سوشل میڈیا کا موضوع بنائے رکھا۔

فیروز خان

فیروز خان ایک بار پھر اپنی نجی زندگی کے باعث خبروں میں رہے۔ شادی، طلاق، سوشل میڈیا اکاؤنٹ ہیک ہونے کے دعوے اور بچوں کے نان نفقے سے متعلق معاملات نے انہیں تنازعات میں گھیرے رکھا۔

ندا یاسر

مارننگ شو میزبان ندا یاسر بھی سال بھر مختلف بیانات اور پروگرام میں ہونے والی گفتگو کے باعث سوشل میڈیا پر زیرِ بحث رہیں۔ انہوں نے حال ہی میں آن لائن ڈلیوری رائیڈرز کے حوالے سے بیان دیا تھا۔

آخر میں، شوبز انڈسٹری میں تنازعات کوئی نئی بات نہیں، مگر 2025 میں کئی بڑے ناموں کے لیے یہ سال خاصا ہنگامہ خیز ثابت ہوا۔ کچھ شخصیات نے تنقید کو نظر انداز کیا، جبکہ کچھ نے وضاحتیں دے کر معاملات سنبھالنے کی کوشش کی۔ شوبز کی دنیا میں شہرت کے ساتھ آزمائشیں بھی لازم و ملزوم دکھائی دیتی ہیں۔