عیدالاضحی سے قبل حکومت نے سرکاری ملازمین کو خوشخبری سنادی

سندھ حکومت نے عیدالاضحیٰ سے قبل سرکاری ملازمین اور پنشنرز کو بڑی سہولت فراہم کرتے ہوئے تنخواہیں اور پنشن 20 مئی تک جاری کرنے کی ہدایت دے دی ہے۔

اس حوالے سے جاری کیے گئے سرکاری اعلامیے میں کہا گیا ہے کہ تمام صوبائی سرکاری ملازمین اور ریٹائرڈ افراد کو عید سے پہلے ادائیگیاں کی جائیں گی تاکہ وہ مذہبی تہوار کی تیاریوں کے لیے بروقت مالی سہولت حاصل کر سکیں۔

اعلامیے میں متعلقہ اداروں اور محکموں کو ہدایت کی گئی ہے کہ تنخواہوں اور پنشن کی بروقت ادائیگی یقینی بنانے کے لیے تمام انتظامات فوری مکمل کیے جائیں تاکہ کسی قسم کی تاخیر نہ ہو۔

حکام کے مطابق اس فیصلے سے سندھ بھر کے ہزاروں ملازمین اور پنشنرز کو عید سے قبل مالی ریلیف ملنے کی توقع ہے۔

دوسری جانب ماہرین نے عیدالاضحیٰ کی متوقع تاریخ کے حوالے سے ابتدائی اندازہ بھی جاری کر دیا ہے۔ رویتِ ہلال ریسرچ کونسل کے ماہرین کے مطابق امکان ہے کہ پاکستان میں عیدالاضحیٰ ستائیس مئی دو ہزار چھبیس کو منائی جائے گی۔

رویتِ ہلال ریسرچ کونسل کے سیکریٹری جنرل خالد اعجاز مفتی کا کہنا ہے کہ سائنسی حساب کے مطابق ذوالحجہ چودہ سو سینتالیس ہجری کا چاند سولہ اور سترہ مئی کی درمیانی شب تقریباً ایک بج کر پندرہ منٹ پر پیدا ہوگا۔

انہوں نے بتایا کہ سترہ مئی کی شام تک چاند کی عمر اتنی ہو جائے گی کہ ملک کے مختلف علاقوں میں اس کی رویت ممکن ہو سکے گی۔ ماہرین کے مطابق کراچی، پشاور اور دیگر شہروں میں غروبِ آفتاب کے بعد چاند کچھ دیر تک افق پر موجود رہے گا، جس سے چاند نظر آنے کے امکانات مزید بڑھ جائیں گے۔