بنوں میں آپریشن کے دوران 22 خوارج ہلاک

سیکیورٹی فورسز نے خیبرپختونخوا کے ضلع بنوں میں کارروائی کرتے ہوئے بھارتی حمایت یافتہ پراکسی گروہ فتنہ الخوارج کے 22 شرپسندوں کو ہلاک کردیا ہے۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے 24 اور 25 نومبر کی شب خفیہ اطلاع کی بنیاد پر بنوں میں کارروائی کی اور خوارج کے ٹھکانے کو مؤثر طریقے سے نشانہ بنایا۔

فائرنگ کے تبادلے میں 22 خوارج ہلاک ہوئے جن میں مطلوب دہشت گرد بھی شامل ہیں جبکہ ہلاک دہشت گردوں سے اسلحہ، بارودی مواد، ایمونیشن بھی برآمد ہوا ہے۔

آئی ایس پی آر کے مطابق یہ کارروائی بھی عزم استحکام پاکستان کے تحت کی گئی ہے اور علاقے میں کلیئرنس آپریشن جاری ہے، آخری دہشت گرد کے خاتمے تک کارروائیاں جاری رہیں گی۔

وزیراعظم شہباز شریف، صدر مملکت اور وزیر داخلہ سمیت دیگر نے کامیاب کارروائی پر فورسز کو خراج تحسین پیش کیا ہے۔