بیرون ملک میں اسائلم لینے والے پاکستانیوں کی شہریت ختم کرنے کا فیصلہ

ملکی سلامتی اور سکیورٹی کے تناظر میں وزیر داخلہ کا بڑا قدم اٹھاتے ہوئے بیرون ملک پناہ لینے والے پاکستانیوں کی شہریت ختم کرنے کا فیصلہ کرلیا ہے جس کے تحت اُن کے شناختی کارڈ بلاک ہوجائیں گے جبکہ پاسپورٹ بھی جاری نہیں کیے جائیں گے۔ 

ڈائریکٹوریٹ جنرل امیگریشن اینڈ پاسپورٹ سے جاری ہونے والے مراسلے کے مطابق پاکستان کے قومی مفادکو سامنے رکھتے ہوئے ایسے تمام پاکستانی جو کسی بھی بنیاد پر دوسرے ممالک میں پناہ لیں گے، ان کو پاسپورٹ نہیں ملے گا۔

مر اسلے کے مطابق وفاقی وزیرداخلہ محسن نقوی نے ہدایت کی ہے کہ ایسے تمام پاکستانی جنہوں نے کسی بھی دوسرے ملک میں پناہ کیلئے درخواست دے رکھی ہے یاپناہ لے چکے ہیں ان کو پاسپورٹ نہیں دیا جائے گا۔

وزیر داخلہ کی ہدایت پر وزارت داخلہ نے مراسلہ جاری کردیا ہے، مراسلہ وزارت خارجہ اور دیگر متعلقہ حکام کو بھی بھجوا دیا گیاہے، فیصلے کے نتیجے میں ان پاکستانیوں کے شناختی کارڈ بھی بعد میں بلاک ہوجائیں گے۔

واضح رہے برطانیہ، امریکا، جرمنی اور ناروے پناہ لینے کیلئے پاکستانیوں کیلئے پسندیدہ ترین ممالک ہیں اوریہ ممالک پاکستان کے ساتھ ڈیٹا شئیرنہیں کرتے جبکہ ریاست کو بھی اس بات کاپتہ نہیں چلتاکہ کون کس ویزہ پر بیرون ملک مقیم ہے، ملکی مفادکو سامنے رکھتے ہوئے ریاست نے ان کوپاسپورٹ نہ جاری کرنے کافیصلہ کیاہے۔