ضلع کرم: فریقین کا غیرمعینہ مدت تک سیز فائر پر اتفاق

ضلع کرم کے دونوں قبائل کے عمائدین کی جانب سے غیرمعینہ مدت تک سیز فائر پر اتفاق کرلیا گیا ہے۔

ذرائع کے مطابق کمشنرکوہاٹ ڈویژن معتصم باللہ شاہ کی سربراہی میں ضلع کرم میں پائیدار امن کے لیے گرینڈجرگے کا انعقاد کیا گیا، جس میں فریقین کے 100 سے زیادہ افرادشریک ہوئے۔

کمشنر کوہاٹ کا کہنا ہے کہ دونوں قبائل کے عمائدین نے ضلع کرم میں غیرمعینہ مدت تک سیز فائرپر اتفاق کیا ہے۔

فریقین نے عہد کیا کہ جنگ یا جھگڑے سے کسی مسئلے کاحل ممکن نہیں اور عشروں پر محیط اس مسئلے کے مستقل اورپائیدار حل کے لیے وقت ضرور درکار ہوگا تاہم اس کے لیے دونوں جانب سے اخلاص اور اعتماد کی ضرورت ہوگی۔

گرینڈ جرگہ کے ارکان نے دونوں فریقین سے انفرادی اوراجتماعی ملاقاتیں کیں اورکئی گھنٹوں کی طویل مشاورت کے بعد اس بات پر متفق ہوگئے کہ ضلع کرم میں جنگ بندی غیر معینہ مدت تک ہوگی۔