فیض حمید ملک کا قیمتی اثاثہ تھا جسے ضائع کردیا گیا، عمران خان

پاکستان تحریک انصاف کے  بانی چیئرمین عمران خان نے کہا ہے کہ جنرل (ر) فیض کو افغانستان کے معاملے پر ہٹایا گیا، وہ ملک کا قیمتی اثاثہ تھا جسے ضائع کردیا گیا۔

190 ملین پاؤنڈ کیس کی اڈیالہ جیل میں سماعت کے دوران صحافیوں سے گفتگو میں عمران خان نے کہا کہ میں جنرل (ر) فیض کو پروفیشنلی حد تک ضرور جانتا تھا اور اُن سے کوئی ذاتی تعلق نہیں تھا۔

انہوں نے کہا کہ افغانستان کے معاملے پر جنرل (ر) فیض حمید کو عہدے سے ہٹایا گیا تو جنرل (ر) باجوہ سے تلخی ہوئی تھی۔

عمران خان نے فیض حمید کی گرفتاری کو فوج کا اندرونی معاملہ قرار دیتے ہوئے کہا کہ اس سے میرا کوئی لینا دینا نہیں ہے البتہ سمجھتا ہوں کہ وہ ایک قیمتی اثاثہ تھا جسے ذاتی عناد اور خواہشات کی بھینٹ چڑھایا گیا۔