فیلڈ مارشل صدر بن رہے ہیں اور نہ ہی آصف زرداری سے استعفی کیا جارہا ہے، محسن نقوی

وفاقی وزیر داخلہ محسن نقوی نے صدر آصف علی زرداری کی تبدیلی یا فیلڈ مارشل سید عاصم منیر کو پاکستان صدر بنانے کے منصوبے سے متعلق خبروں کو سختی سے مسترد کردیا ہے۔

سماجی رابطوں کی ویب سائٹ ایکس پر جاری کردہ ایک بیان میں محسن نقوی نے ان افواہوں کو بے بنیاد اور سیاسی مقاصد کے لیے پھیلائی جانے والی سازش قرار دیا۔

انہوں نے ایکس پر لکھا، "ہم خوب جانتے ہیں کہ صدر آصف علی زرداری، وزیراعظم شہباز شریف اور آرمی چیف کے خلاف اس گھناؤنی مہم کے پیچھے کون ہے۔ 

انہوں نے لکھا کہ ''میں نے واضح طور پر کہا ہے کہ نہ تو صدر سے استعفیٰ مانگنے پر کوئی بات ہوئی ہے اور نہ ہی آرمی چیف کے صدر بننے کی کوئی خواہش یا منصوبہ موجود ہے۔"

محسن نقوی کے مطابق، صدر زرداری نے خود ان حالیہ افواہوں کو سختی سے رد کیا اور کہا، "میں جانتا ہوں کہ یہ جھوٹی باتیں کون پھیلا رہا ہے، اس کا مقصد کیا ہے اور اس پروپیگنڈے سے کس کو فائدہ ہوگا۔"

وزیر داخلہ نے مزید کہا کہ آرمی چیف کا واحد فوکس "پاکستان کی مضبوطی اور استحکام" ہے اور اس کے علاوہ کچھ نہیں ہے۔ 

محسن نقوی نے انکشاف کیا کہ کچھ عناصر "دشمن غیر ملکی ایجنسیوں" کے ساتھ مل کر ان بے بنیاد افواہوں کو پھیلا کر عدم استحکام اور افراتفری پیدا کرنے کی کوشش کر رہے ہیں۔ تاہم، انہوں نے یقین دلایا کہ حکومت استحکام کو یقینی بنانے کے لیے پرعزم ہے۔