اگر مصطفی قتل کیس کو درست ہینڈل کیا گیا تو نوجوان نسل کو نشے سے بچاسکیں گے، گورنر سندھ

گورنر سندھ نے کہا ہے کہ اگر مصطفیٰ عامر کے کیس کو درست طریقے سے ہینڈل کیا گیا تو نوجوان نسل کو ہم نشے سے بچا سکیں گے۔

کراچی گورنر ہاؤس میں مصطفیٰ عامر قتل کیس پر بات کرتے ہوئے کہا کہ سیکیورٹی ادارے اس کیس کی تحقیقات کر رہے ہیں اور اسے منطقی انجام تک پہنچایا جائے گا۔

انہوں نے کہا کہ اگر اس کیس کو صحیح طریقے سے ہینڈل کیا گیا تو نوجوان نسل کو نشے سے بچایا جا سکتا ہے۔ پاکستان میں بیرون ملک سے 32 اقسام کی منشیات درآمد کی جا رہی ہیں اور تعلیمی اداروں کو خط لکھا گیا ہے کہ طلبہ اور اساتذہ کے نشے کے رینڈم ٹیسٹ کروائے جائیں۔

کامران ٹیسوری نے کہا کہ گورنر ہاؤس میں انسداد منشیات سے متعلق ایک خصوصی سیل بنایا جا رہا ہے۔

انہوں نے کہا کہ منشیات کے خلاف جنگ میں بااثر افراد کو پشت پناہی حاصل ہے، اور والدین کو چاہیے کہ وہ اپنے بچوں پر کڑی نظر رکھیں۔ انہوں نے بتایا کہ 32 سے زائد منشیات کی اشکال میں اشیا موجود ہیں، اور شکایات موصول ہو رہی ہیں کہ انگلش میڈیم اسکولوں میں ٹیچرز بھی منشیات میں ملوث ہیں۔

گورنر سندھ نے اس بات پر زور دیا کہ منشیات کے خلاف جنگ میں سب کو مل کر کام کرنا ہوگا، اور اس سلسلے میں تعلیمی اداروں کو بھی اپنا کردار ادا کرنا چاہیے۔