غزہ میں اسرائیلی حملہ، دو معصوم فلسطینی بھائی شہید

غزہ کے جنوبی قصبے بنی سہیلہ میں اسرائیلی ڈرون حملے سے دو فلسطینی بچے جان کی بازی ہار گئے۔

ناصر اسپتال کے طبی عملے کے مطابق جاں بحق ہونے والوں میں 11 سالہ فادی ابو اسی اور اس کا آٹھ سالہ بھائی جماعہ شامل ہیں۔ دونوں بچوں کو حملے کے فوراً بعد تشویشناک حالت میں اسپتال منتقل کیا گیا تھا۔

عینی شاہدین کا کہنا ہے کہ حملہ ایک ایسے اسکول کے قریب کیا گیا جہاں بڑی تعداد میں بے گھر خاندان پناہ لیے ہوئے ہیں۔ بچوں کے چچا محمد ابو اسی نے بتایا کہ دونوں بھائی اپنے معذور والد کے لیے لکڑیاں اکٹھی کرنے گئے تھے۔ ان کا کہنا تھا، “وہ صرف بچے تھے، نہ ان کے پاس کوئی ہتھیار تھا، نہ کوئی خطرہ۔ بس لکڑی چن رہے تھے۔”

جاں بحق بچوں کی نمازِ جنازہ کے موقع پر ان کے والد کو اپنے بیٹے کے جسدِ خاکی سے لپٹ کر روتے دیکھا گیا، جب ماتمیوں نے کفن ہٹا کر آخری دیدار کرایا۔

واقعے کے بعد اسرائیلی فوج نے دعویٰ کیا کہ متاثرہ مقام پر موجود افراد نے مبینہ طور پر “پیلا حد بندی زون عبور کیا اور مشکوک حرکات” کیں، جس کی بنیاد پر انہیں فوری خطرہ سمجھا گیا۔

یہ افسوسناک واقعہ اس وقت پیش آیا ہے جب امریکی صدر ڈونلڈ ٹرمپ کی ثالثی سے ہونے والے 20 نکاتی جنگ بندی معاہدے کو نافذ ہوئے ابھی دو ماہ بھی مکمل نہیں ہوئے۔