حکومت کا نئے سال پر عوام کو پیٹرولیم مصنوعات میں ریلیف دینے پر غور

وفاقی حکومت نے نئے سال کے آغاز پر عوام کو ریلیف دینے کے لیے پٹرولیم مصنوعات کی قیمتوں میں کمی پر غور شروع کر دیا ہے، جس سے شہریوں کو مہنگائی کے دباؤ میں کچھ سہولت ملنے کا امکان ہے۔

ذرائع کے مطابق یکم جنوری سے پٹرول کی قیمت میں فی لیٹر 10 روپے 60 پیسے تک کمی متوقع ہے، جبکہ ہائی اسپیڈ ڈیزل 8 روپے 59 پیسے، لائٹ ڈیزل 6 روپے 62 پیسے اور مٹی کا تیل 8 روپے 92 پیسے سستا ہونے کا امکان ہے۔

بتایا گیا ہے کہ آئل اینڈ گیس ریگولیٹری اتھارٹی (اوگرا) 31 دسمبر کو قیمتوں سے متعلق اپنی سمری پٹرولیم ڈویژن کو بھجوائے گی، جس کے بعد وزیراعظم کی منظوری سے نئی قیمتوں کا باضابطہ اعلان کیا جائے گا۔

ذرائع کا کہنا ہے کہ مجوزہ نئی قیمتوں کا اطلاق یکم جنوری کی رات بارہ بجے سے ہو گا۔ واضح رہے کہ ملک میں پٹرولیم مصنوعات کی قیمتوں کا تعین ہر پندرہ دن بعد عالمی منڈی کی صورتحال کو مدنظر رکھتے ہوئے کیا جاتا ہے، اور رواں ماہ دسمبر میں پہلے ہی دو بار قیمتوں میں کمی کی جا چکی ہے۔

اگر مجوزہ کمی کی منظوری مل جاتی ہے تو نئے سال کے آغاز پر عوام کو ایک بڑا ریلیف ملنے کی امید ہے۔