کم عمری میں شادی پر عدالت کا نکاح خواں اور رجسٹرار کے خلاف کارروائی کا حکم

لاہور ہائیکورٹ نے کم عمر لڑکیوں کا نکاح رجسٹرڈ کرنے والے رجسٹرار کے خلاف کارروائی کا حکم دے دیا۔

تفصیلات کے مطابق جسٹس انوار الحق نے عظمت بی بی خاتون کی جانب سے دائر درخواست پر تحریری فیصلہ سنایا اور لکھا کہ عدالتی حکم کے باوجود کمسن بچوں کی شادیاں جاری ہیں۔

عدالت نے کہا کہ نکاح رجسٹرار اور نکاح خواں عدالتی احکامات کی مسلسل خلاف ورزی کررے ہیں لہذا متعلقہ ادارے ایسے رجسٹرار اور نکاح خواہانوں کے خلاف سخت کارروائی کریں۔

عدالت نے فیصلے میں مزید لکھا کہ ہائیکورٹ نے کمسن بچوں کی شادی روکنے کے حوالے سے احکامات جاری کیے ہیں، نکاح کے وقت رجسٹرار، نکاح خوان اور گواہان دلہن کی عمر کی تصدیق ضرور کریں۔

واضح رہے کہ عظمت بی بی نے اپنی چودہ سالہ بیٹی کی بازیابی اور جبری نکاح کے خلاف عدالت میں درخواست دائر کی تھی۔