کراچی میں آئندہ ہفتے سے ڈبل ڈیکر اور نئی ای وی بسیں چلانے کا فیصلہ

سندھ حکومت نے کراچی میں آئندہ ہفتے سے ڈبل ڈیکر بسیں اور نئی ای وی بسیں چلانے کا فیصلہ کیا ہے جبکہ سندھ کے دیگر اضلاع میں پیپلز بس سروس کے نئے روٹس شروع کرنے کا بھی اعلان سامنے آیا ہے۔

ذرائع کے مطابق سندھ کے سینیئر وزیر شرجیل انعام میمن کی زیر صدارت محکمہ ٹرانسپورٹ کے اجلاس کا انعقاد ہوا۔

شرجیل انعام میمن کو اجلاس میں یلو لائن بی آر ٹی اور ریڈ لائن بی آر ٹی کے ترقیاتی کام میں پیش رفت پر بریف کیا گیا جبکہ کراچی میں ای وی ٹیکسی سروس شروع کرنے اور پنک اسکوٹیز اسکیم کے دوسرے مرحلے پر  بریفنگ دی گئی۔

شرجیل انعام میمن کا کہنا تھا کہ امید ہے ڈبل ڈیکر بسیں اور نئی ای وی بسیں آئندہ ہفتے تک کراچی پہنچ جائیں گی۔

انہوں نے کہاکہ حکومت سندھ دسمبر تک ای وی ٹیکسی شروع کرنے اور حالیہ مالی سال مزید 500  بسیں لانے کا ارادہ رکھتی ہے۔

سندھ کے سینئر وزیر نے کہا کہ سندھ کے دیگر اضلاع میں بہت جلد پیپلز بس سروس کے نئے روٹس بھی شروع کرنے جا رہے ہیں۔

شرجیل انعام میمن کی ٹرانسپورٹ حکام کو نئے روٹس کے حوالے سے آپریشنل تیاریاں مکمل کرنے کی ہدایت کی۔