کراچی میں شہری کو کچلنے والا ٹریفک پولیس افسر کے نشے میں ہونے کی تصدیق

شہر قائد کے علاقے کلفٹن میں نیوایئر کی رات کو اپنی گاڑی سے شہری کو کچلنے والے پولیس افسر کا نشہ میں کار چلانے کا انکشاف ہوا جس پر اُن کے خلاف مقدمہ درج کرلیا گیا ہے۔

تفصیلات کے مطابق کلفٹن کے پی ٹی انڈر پاس کے قریب تیز رفتاری سے گاڑی چلا کر سوزوکی پک کے ڈرائیور کو ہلاک کرنے کے الزام میں کلفٹن پولیس کے ہاتھوں گرفتار ایس او مومن آباد انسپکٹر شاہد عزیز کے حوالے سے ترجمان کراچی پولیس کی جانب سے جاری اعلامیے میں کہا گیا ہے کہ کلفٹن تھانے کی حدود میں نیو ائیر کی شب ٹریفک پولیس کے انسپکٹر شاہد عزیز جو کہ ایک شخص کی دوران ڈرائیونگ ہلاکت کا سبب بنا اور اس کے خلاف تعزیرات پاکستان کی دفعہ 322 قتل بالسبب جو کہ نا قابل ضمانت ہے کے تحت قانونی کاروائی عمل میں لائی جا رہی ہے ۔

اعلامیے کے مطابق گرفتار اہلکار کو تحویل اور ریمانڈ میں لے کر باقاعہد میڈیکل بھی کروایا گیا جس کی روپرٹ موصول ہونے پر پولیس افسر کے خلاف منشیات کا مقدمہ درج کیا جائے گا۔

اعلامیے میں کہا گیا ہے کہ پولیس افسر کے خلاف محکمہ جاتی کارروائی کا بھی آغاز کر دیا گیا ہے جس میں انھیں کسی بھی قسم کی کوئی رعایت نہیں دی جائیگی جبکہ کارروائی مکمل ہونے پر پولیس افسر کو کڑی سزا دی جائیگی۔