آخری پتہ باقی ہیں مگر ابھی استعمال نہیں کروں گا، عمران خان

پاکستان تحریک انصاف کے بانی چیئرمین عمران خان نے کہا ہے کہ اُن کے پاس ابھی آخری پتہ باقی ہے جسے وہ فی الحال استعمال کرنے کا ارادہ نہیں رکھتے۔

اڈیالہ جیل میں ملاقات کے بعد علیمہ خان نے بتایا کہ عمران خان نے کہا ہے کہ گولی چلانے پر کسی کو معافی نہیں دی جائے گی، بشری بی بی نے قافلے کو لیڈ کیا ڈی چوک پر کارکنان کے بجائے قیادت کو آگے جانا چاہیے تھا۔

علیمہ خان کے مطابق عمران خان ڈی چوک واقعے پر صدمے میں ہیں اور انہوں نے محسن نقوی، شہباز شریف کے خلاف ایف آئی آر کے اندراج کا حکم دیا ہے جبکہ ہدایت کی ہے کہ اس واقعے کو سپریم کورٹ اور عالمی اداروں کے سامنے بھی اجاگر کریں۔

علیمہ خان کے بقول عمران خان نے کہا ہے کہ اُن کے پاس ابھی آخری پتہ موجود ہے جسے وہ فی الحال استعمال نہیں کریں گے۔ انہوں نے تصدیق کی کہ عمران خان کی صحت بالکل ٹھیک ہے تاہم اُن سے ٹی وی اور اخبار کی سہولت واپس لے لی گئی ہے۔

’عمران خان کو یہ بھی بتایا کہ 12 لاشیں صرف اس لیے ہیں کہ بہت سے لوگ لاپتا اور جیلوں میں ہیں، لواحقین بہت بڑی تعداد میں اپنے بچوں کو ڈھونڈ رہے ہیں، بہت سی لاشیں ابھی تک لاپتا ہیں‘۔

انہوں نے بتایا کہ بانی نے کہا سب اسپتال جائیں اور معلوم کریں جس پر انہیں بتایا کہ جو اسپتال جاتا ہے اس کو اٹھا لیا جاتا ہے، ہمارے لوگ آئینی حق استعمال کررہے تھے، یہ جو ظلم ہوا ہے لوگوں کو بلا کر دن میں اسنائپر سے گولیاں مروائی گئیں اور رات میں پوری بریگیڈ بلا کر حملہ کیا۔ 

علیمہ خان نے کہا کہ جب اسنائپر سے فائرنگ ہوئی لاشیں پڑی تھیں، ہم نے کہا تھا کہ کنٹینرز سے کال دیں کہ مظاہرین پیچھے چلے جائیں یہ تو کسی نے سوچا بھی نہیں تھا کہ یہاں گولیاں ماریں گے۔

انہوں نے کہا کہ میں ڈی چوک پر لوگوں سے کہہ رہی تھی پیچھے ہٹ جائیں گولیاں چل رہی ہیں لیکن لوگ آگے جا رہے تھے۔ اب بھی سوال ہے کہ گولی چلی کیوں؟