خیبرپختونخوا پولیس نے چینی سیاحوں کو داخلے سے روک کر واپس بھیج دیا

خیبرپختونخوا میں پولیس کی جانب سے سائیکل پر آنے والے چینی سیاحوں کو روک کر صوبے سے واپس بھیجنے کی وجہ سامنے آگئی۔

گورنر خیبرپختونخوا کے سخت نوٹس اور اظہار برہمی کے بعد خیبرپختونخوا پولیس نے چینی شہریوں کو داخل ہونے سے روکنے کی وضاحت کردی اور بتایا کہ سائیکلوں پر سوار چینی سیاح این او سی (اجازت نامے) کے بغیر پشاور میں داخل ہونے کے خواہش مند تھے۔

پولیس ترجمان نے بتایا کہ سائیکل پر آنے والے چینی سیاحوں کو خیبرآباد کے مقام پر روک کر پولیس اسکواڈ میں اسلام آباد روانہ کردیا گیا ہے۔ اعلامیے کے مطابق صوبے میں غیر ملکیوں کے بغیر اجازت داخلے و نقل و حرکت پر پابندی ہے اور اس کی اجازت وزارت داخلہ سے لی جاتی ہے۔

وزارت داخلہ سے اجازت کے بعد پولیس غیر ملکیوں کی نقل و حرکت پر نہ صرف نظر رکھتی ہے بلکہ انہیں بھرپور سیکیورٹی بھی فراہم کرتی ہے۔