القادر سکینڈل: نعیم بخاری کی عمران خان پر شدید تنقید

معروف قانونی ماہر نعیم بخاری نے پاکستان تحریک انصاف (پی ٹی آئی) کے بانی عمران خان کو ان کے اقتدار کے دوران ان کے طرز عمل اور ان کے انتخاب پر شدید تنقید کا نشانہ بنایا۔

نجی چینل کی رپورٹ کے مطابق نعیم بخاری نے القادر ٹرسٹ کیس میں عمران خان کے ملوث ہونے کی شدید مذمت کرتے ہوئے کہا کہ 'انہیں القادر ٹرسٹ سے منسلک زمین کو ہاتھ نہیں لگانا چاہیے تھا'۔

نعیم بخاری نے اپنے مشیروں کے انتخاب میں عمران خان کے فیصلے پر بھی سوال اٹھایا، ریمارکس دیتے ہوئے کہا کہ ، "وہ کردار کے لحاظ سے اچھے لوگ نہیں تھے، وہ فواد چوہدری اور بابر اعوان جیسے لوگوں کو اپنا مشیر کیسے چن سکتے ہیں؟"۔

توشہ خانہ تحائف سکینڈل کا حوالہ دیتے ہوئے نعیم بخاری نے سابق وزیر اعظم کے اقدامات پر شدید تحفظات کا اظہار کرتے ہوئے کہاکہ آپ کسی بھی ایسی چیز پر کیسے قبضہ کر سکتے ہیں جو ریاست کی ہو؟ یہاں تک کہ بطور تحفہ دیا گیا بال پین یا پنسل بھی ریاست کی ملکیت سمجھی جاتی ہے۔

ان کا مزید کہنا تھا کہ عمران خان تیزی سے توہم پرستی کا شکار ہو گئے ، وہ اکثر ایسی باتیں کہتے رہتے ہیں کہ آج کا دن اچھا نہیں ہے۔ بخاری کے تبصرے ایک سینئر قانونی شخصیت کی طرف سے اہم مگر شدید تنقید کی نشاندہی کرتے ہیں جو کبھی پی ٹی آئی کی قیادت کے قریب تھے۔