امریکا افغانستان میں کتنے اربوں ڈالر کا جنگی سازو سامان چھوڑ کر گیا؟ ڈی جی آئی ایس پی آر نے بتادیا

ڈی جی آئی ایس پی آر لیفٹیننٹ جنرل احمد شریف چوہدری نے سینئر صحافیوں سے گفتگو میں بتایا کہ امریکی افواج واپسی کے دوران 7.2 بلین ڈالر مالیت کا فوجی ساز و سامان افغانستان میں چھوڑ گئیں، جسے اب دہشتگرد گروہ استعمال کر رہے ہیں۔

سینئر صحافیوں سے گفتگو کرتے ہوئے ڈی جی آئی ایس پی آر نے کہا کہ افغان طالبان کی موجودہ حکومت نہ صرف پاکستان بلکہ خطے کی سلامتی کے لیے سنگین چیلنج بن چکی ہے۔

انہوں نے کہا کہ 4 نومبر 2025 سے ملک بھر میں 4,910 انٹیلی جنس آپریشن کیے گئے جن میں 206 دہشتگرد مارے گئے، جبکہ رواں سال مجموعی طور پر 67 ہزار سے زائد کارروائیاں ہوئیں جن میں 1,873 شدت پسند ہلاک ہوئے، جن میں 136 افغان شامل تھے۔

بارڈر مینجمنٹ پر بات کرتے ہوئے ڈی جی آئی ایس پی آر نے کہا کہ پاک افغان سرحد انتہائی دشوار گزار ہے اور افغان جانب مؤثر انتظامی ڈھانچے کی کمی سے دراندازی اور اسمگلنگ میں اضافہ ہوتا ہے۔

انہوں نے واضح کیا کہ افغان طالبان پاکستان مخالف گروہوں کی کھلی پشت پناہی کر رہے ہیں، جب کہ دوحہ معاہدے کے تحت ان پر لازم تھا کہ اپنی سرزمین دہشتگردی کے لیے استعمال نہ ہونے دیں۔ ان کا کہنا تھا کہ افغانستان میں Non-State Actors کو کھلی آزادی حاصل ہے، اور پاکستان کا مطالبہ ہے کہ طالبان ایک قابلِ تصدیق میکانزم کے تحت دہشتگردی کی روک تھام کو یقینی بنائیں۔

خطے کی صورتحال پر بات کرتے ہوئے انہوں نے بھارتی قیادت کے جنگی بیانات کو ’’خود فریبی‘‘ قرار دیا اور کہا کہ حقیقت کے برعکس بیانات صرف عوامی دباؤ کم کرنے کی کوشش ہیں۔

انہوں نے بتایا کہ ایرانی ڈیزل کی اسمگلنگ میں کمی لانے سے دہشتگرد گروہوں کی مالی سپورٹ کم ہوئی ہے، جبکہ بلوچستان کے 27 اضلاع کو پولیس کے دائرہ کار میں لا کر نیشنل ایکشن پلان پر عملی پیش رفت کی جارہی ہے۔