مصطفی کو قتل کرنے کے بعد ارمغان کو والد نے روپوش ہونے کا مشورہ دیا

مصطفی عامر قتل کیس میں پولیس نے ملزم ارمغان کی ریمانڈ رپورٹ خصوصی عدالت میں جمع کرادی۔

رپورٹ میں انکشاف کیا گیا کہ ملزم نے قتل کے بعد اپنے والد کو آگاہ کیا جس کے بعد والد نے ملزم کو روپوش ہونے کا مشورہ دیا۔  

ریمانڈ رپورٹ کے مطابق،ملزم ارمغان نے بتایا کہ اس کے والد نے نہ صرف روپوش ہونے کا مشورہ دیا بلکہ یہ بھی کہا کہ بعد میں سافٹ ویئر ہاؤس کا کاروبار شہر سے باہر منتقل کرلیا جائے گا۔ ملزم نے عدالت کو بتایا کہ وہ اپنے والد کے مشورے پر ساتھی شیراز کے ساتھ لاہور، اسلام آباد اور اسکردو میں روپوش رہا۔  

رپورٹ میں یہ بھی کہا گیا کہ ملزم ارمغان سے برآمد ہونے والے اسلحہ کی تحقیقات سی ٹی ڈی کررہا ہے، جب کہ سائبر کرائم سے متعلق معاملات کی تفتیش ایف آئی اے کے ذمے ہے۔ اینٹی نارکوٹکس فورس نے بھی ملزم سے تفتیش کی ہے۔ واضح رہے کہ ملزم ارمغان دیگر متعدد مقدمات میں بھی نامزد اور مطلوب ہے۔  

پولیس کو ہدایت دی گئی ہے کہ جن تھانوں کے مقدمات میں ملزم مطلوب یا مفرور ہے، وہاں اس کے خلاف قانونی کارروائی کی جائے۔ تفتیشی عمل جاری ہے اور مزید تفصیلات کا انتظار ہے۔