متنازع ٹویٹ کیس میں ایمان مزاری اور ہادی علی چٹھہ کی تین درخواستیں خارج

اسلام آباد کی ڈسٹرکٹ اینڈ سیشن کورٹ نے جمعرات کے روز متنازع ٹوئٹ کیس میں ایمان مزاری اور ہادی علی چٹھہ کی جانب سے دائر تین مختلف درخواستوں کو ناقابلِ سماعت قرار دیتے ہوئے مسترد کر دیا۔

ایڈیشنل سیشن جج محمد افضل مجوکہ نے ایمان مزاری کی بریت کی درخواست پر فیصلہ سناتے ہوئے اسے خارج کر دیا، جب کہ دونوں ملزمان کی جانب سے دوبارہ جرح کرنے کی درخواست بھی عدالت نے منظور نہ کی۔

اسی طرح، اسٹیٹ کونسل کے تقرر سے متعلق دائر درخواست بھی عدالت نے ردّ کر دی۔

سماعت کے دوران ایمان مزاری اور ہادی علی چٹھہ کے وکیل شیر افضل مروت اور پراسیکیوشن کا مکمل پینل عدالت میں موجود تھا۔ شیر افضل مروت نے مؤقف اختیار کیا کہ دفعہ 342 کے تحریری جوابات جمع کرانے کے لیے ایک دن مہلت دی جائے۔ اس پر جج نے ریمارکس دیے کہ "سوالات کا جواب جمع کرا دیں، تاریخ کل دے دیتا ہوں۔"

سماعت کے دوران شیر افضل مروت نے کمرہ عدالت میں پولیس کی زیادہ تعداد پر اعتراض اٹھاتے ہوئے کہا کہ "آج عدالت کا ماحول دیکھ کر گھٹن محسوس ہو رہی ہے، یہ عدالت ہے تھانہ نہیں۔"

بعد ازاں سرکاری وکیل نے ایمان مزاری اور ہادی علی چٹھہ کی جانب سے دفعہ 342 کے بیانات عدالت میں جمع کرا دیے، جس کے بعد عدالت نے کیس کی مزید کارروائی حتمی دلائل کے لیے کل تک ملتوی کر دی۔