نوجوانوں کی صلاحیتوں کے فروغ کے لیے فوج اپنی حمایت جاری رکھے گی، آرمی چیف

چیف آف آرمی اسٹاف جنرل سید عاصم منیر، نشانِ  نے بہاولپور چھاؤنی کا دورہ کیا، دورے کے دوران  انہیں بہاولپور کور کی آپریشنل تیاریوں اور تربیتی سرگرمیوں پر بریفنگ دی گئی۔ 

پاک فوج کے شعبہ تعلقات عامہ (آئی ایس پی آر) کے مطابق بہاولپور چھاؤنی میں افسران اور جوانوں سے خطاب کرتے ہوئے، آرمی چیف نے ان کی بے مثال لگن، غیر متزلزل جذبے، بلند حوصلے اور جنگی تیاریوں کو سراہا۔

انہوں نے زور دیا کہ سخت اور مؤثر تربیت ایک سپاہی کی پیشہ ورانہ ترقی کی بنیاد ہے اور جدید جنگی چیلنجز کا مقابلہ کرنے کے لیے یہ پاکستان آرمی کی نمایاں خصوصیت ہے۔

دورے کے دوران، آرمی چیف نے سی ایم ایچ انسٹی ٹیوٹ آف میڈیکل سائنسز انووسٹا چولستان، اور انٹیگریٹڈ کومبیٹ سمیولیٹر ایرینا کا افتتاح کیا۔

یہ جدید منصوبے طبی تعلیم، انفارمیشن ٹیکنالوجی، اور جنگی تیاریوں کے فروغ کے لیے متعارف کروائے گئے ہیں۔

ادارے کے دورے ک موقع پر، آرمی چیف نے بہاولپور کی مختلف یونیورسٹیوں کے طلبہ سے ملاقات کی اور نوجوانوں کی صلاحیتوں میں بہتری کے لیے پاک فوج کے اقدامات کو اجاگر کیا۔

انہوں نے طلبہ کو تعلیمی میدان میں محنت اور لگن کے ساتھ آگے بڑھنے کی ترغیب دی اور کہا کہ وہ اپنی مہارتوں میں اضافہ کرکے قومی ترقی میں بامعنی کردار اداکریں۔

آرمی چیف نے پاکستان کے مستقبل کی تشکیل میں نوجوانوں کے اہم کردار کی تعریف کی اور نوجوانوں کی صلاحیت کے فروغ کے لیے فوج کی مکمل حمایت کا اعادہ کیا۔ 

قبل ازیں، بہاولپور آمد پر کور کمانڈر بہاولپور نے آرمی چیف کا استقبال کیا۔