پاکستان کا غزہ امن فورس میں شمولیت پر اظہار آمادگی

ڈپٹی وزیراعظم اور وزیرِ خارجہ اسحاق ڈار نے کہا ہے کہ پاکستان غزہ کے لیے مجوزہ بین الاقوامی امن فورس میں اپنی افواج بھیجنے کے لیے تیار ہے، تاہم انہوں نے واضح کر دیا کہ پاکستان کسی صورت فلسطینی مزاحمتی تنظیم حماس کے غیر مسلح کرنے کے عمل کا حصہ نہیں بنے گا۔

ترجمان دفترِ خارجہ میں پریس کانفرنس کرتے ہوئے انہوں نے کہا کہ پاکستان کا کردار امن قائم رکھنا ہے، امن نافذ کرنا نہیں۔ حماس کو غیر مسلح کرنا ہماری ذمہ داری نہیں، یہ کام فلسطینی سیکیورٹی اداروں کا ہے۔

اسحاق ڈار نے بتایا کہ غزہ کے لیے تشکیل دی جانے والی انٹرنیشنل اسٹیبلائزیشن فورس (ISF) کے مینڈیٹ اور ضابطہ کار طے ہونے کے بعد ہی پاکستان حتمی فیصلہ کرے گا۔ ان کے مطابق وزیراعظم اور عسکری قیادت سے مشاورت کے بعد اصولی رضامندی ظاہر کی جا چکی ہے۔

انہوں نے یہ بھی انکشاف کیا کہ مشاورتی اجلاسوں کے دوران انڈونیشیا نے نہ صرف فورس میں شمولیت کا اشارہ دیا بلکہ 20 ہزار فوجی فراہم کرنے کی پیشکش بھی کی۔ پاکستان کی جانب سے بھی مثبت جواب دیا گیا ہے، جس کے لیے آرمی چیف کی منظوری انہیں موصول ہو چکی ہے اور وزیرِاعظم کی باضابطہ ہدایت کا انتظار ہے۔

غزہ امن معاہدے میں ISF کا قیام ایک کلیدی نکتہ ہے، جسے امریکی ثالثی میں تیار کیا گیا اور گزشتہ ہفتے اقوام متحدہ کی سلامتی کونسل نے اس کی منظوری دی۔ 15 میں سے 13 ارکان نے جس میں پاکستان بھی شامل تھا۔قرارداد کے حق میں ووٹ دیا، جبکہ روس اور چین نے ووٹنگ میں حصہ نہیں لیا۔

دوسری جانب، حماس نے سلامتی کونسل کی قرارداد مسترد کرتے ہوئے الزام عائد کیا کہ مجوزہ فورس کا مقصد غزہ کی مزاحمتی جماعتوں کو غیر مسلح کرنا ہے، جسے وہ قبول نہیں کریں گے۔

اسحاق ڈار کے مطابق حماس کو غیر مسلح کرنے کا معاملہ پہلی بار ریاض میں ہونے والی ملاقات کے دوران زیرِ بحث آیا، جہاں دو ریاستی حل کے حوالے سے پیش رفت کا جائزہ لیا جا رہا تھا۔

ذرائع کے مطابق وفاقی حکومت ISF میں شمولیت سے متعلق جلد باضابطہ اعلان کر سکتی ہے، کیونکہ اس معاملے پر سول و عسکری سطح پر مشاورت “حتمی مراحل” میں داخل ہو چکی ہے۔