پاکستان نے ایران امریکا مذاکرات کے دوسرے مرحلے کی میزبانی کی پیشکش کردی

پاکستان کی جانب سے امریکا اور ایران مذاکرات کے دوسرے دور کی میزبانی کی پیشکش

پاکستان نے امریکا اور ایران کے درمیان جاری مذاکرات کے اگلے مرحلے کی میزبانی کی پیشکش کر دی ہے۔

امریکی خبر رساں ادارے کے مطابق دو پاکستانی حکام کا کہنا ہے کہ اسلام آباد نے تجویز دی ہے کہ جنگ بندی کی مدت ختم ہونے سے پہلے مذاکرات کا اگلا دور یہیں منعقد کیا جائے۔

رپورٹس کے مطابق امریکا اور ایران کے درمیان مذاکرات کا دوسرا مرحلہ جمعرات کو ہونے کا امکان ظاہر کیا جا رہا ہے، جبکہ ایک امریکی عہدیدار نے بھی اس بات کی تصدیق کی ہے کہ دونوں ممالک نئے بالمشافہ مذاکرات کے امکان پر غور کر رہے ہیں۔

دوسری جانب امریکی نشریاتی ادارے کا کہنا ہے کہ امریکا اور ایران کے درمیان بات چیت کا سلسلہ تاحال جاری ہے اور فریقین کسی ممکنہ معاہدے کی جانب پیش رفت کر رہے ہیں۔

ذرائع کے مطابق دونوں ممالک کے درمیان جاری رابطوں میں بتدریج بہتری آ رہی ہے، جس کے باعث مثبت نتائج کی امید بھی ظاہر کی جا رہی ہے۔