آپریشن عزم استحکام، عمران خان کا ملک کی خاطر حکومت کی آل پارٹیز کانفرنس میں شرکت کا اعلان

پاکستان تحریک انصاف کے بانی چیئرمین عمران خان نے آپریشن عزم استحکام کے حوالے سے بلائی جانے والی آل پارٹیز کانفرنس میں شرکت کا اعلان کردیا۔

اڈیالہ جیل میں کیس کی سماعت کے بعد صحافیوں سے غیر رسمی گفتگو میں عمران خان نے اے پی سی میں شرکت کا اعلان کرتے ہوئے کہا کہ پی ٹی آئی کے نمائندے اس کانفرنس میں صرف سامع کی حیثیت سے شرکت کریں گے۔

انہوں نے کہا کہ اے پی سی میں شرکت کا فیصلہ پاکستان کی خاطر کیا ہے، پارٹی رہنما شرکت کر کے حکومت کی آپریشن کے حوالے سے منصوبہ بندی سنیں گے۔

بانی چیئرمین پی ٹی آئی نے چیف جسٹس پر عدم اعتماد کا اظہار کرتے ہوئے جیل میں بھوک ہڑتال کا بھی اعلان کیا۔ انہوں نے کہا کہ وکلا کی مشاورت کے بعد بھوک ہڑتال کی حتمی تاریخ کا اعلان کروں گا۔