پی ٹی آئی سے مذاکرات اسیٹبلشمنٹ کی رضامندی سے ہونے کا انکشاف

وزیراعلیٰ خیبرپختونخوا علی امین گنڈا پور نے دعویٰ کیا ہے کہ اسٹیبلشمنٹ کی رضامندی کے بعد ہی حکومت مذاکرات کررہی ہے۔

حکومت اور پی ٹی آئی کی مذاکراتی کمیٹی کے دوسرے اجلاس کے بعد پارلیمنٹ ہاؤس میں صحافیوں کے سوالات کا جواب دیتے ہوئے انہوں نے کہا کہ پاکستان میں اسٹیبلشمنٹ کا جو کردار ہے وہ کسی سے ڈھکا چھپا نہیں، حکومت اسٹیبلشمنٹ کی رضامندی کے بعد ہی مذاکرات کررہی ہے۔

انہوں نے کسی اور جگہ مذاکرات سے متعلق سوال کا جواب دیتے ہوئے کہا کہ ’میں کہیں بھی کسی اور سے کوئی مذاکرات نہیں کررہا، کھلی کتاب ہوں اور جوب بھی ہوگا وہ کھل پر آپ سب کے سامنے آجائے گا‘۔ انہوں نے حکومت کے علاوہ پی ٹی آئی کے اسٹیبلشمنٹ کے ساتھ مذاکرات کی خبروں کی تردید بھی کی۔ علی امین گنڈا پور نے مذاکرات میں حکومت کے رویے کو مثبت قرار دیتے ہوئے بات چیت آگے بڑھنے کی امید ظاہر کی۔

وزیراعلیٰ خیبرپختونخوا نے کہا کہ 26 نومبر کو جن لوگوں نے اپنی جانیں قربان کیں وہ شہدائے جمہوریت ہیں اور ہم انہیں کبھی فراموش نہیں کرسکتے۔