سابق وفاقی وزیر خالد انور 87 سال کی عمر میں انتقال کرگئے

کراچی: ممتاز قانون دان اور سابق وفاقی وزیر خالد انور 87 سال کی عمر میں انتقال کرگئے۔

ذرائع کے مطابق سابق وزیر قانون خالد انور کا انتقال کراچی میں ہوا، ان کے فرزند راشد انور ایڈووکیٹ کے مطابق والد کچھ عرصے سے بیمار تھے اور نجی اسپتال میں زیر علاج تھے جہاں آج صبح خالق حقیقی سے جا ملے۔

مرحوم کی نماز جنازہ 14 مارچ بعدنماز جمعہ سلطان مسجد ڈیفنس میں ادا کی جائیگی۔

خالد انور بیرسٹر ایٹ لا اور سینٹ جان کالج کیمبرج یونیورسٹی سے گریجویٹ تھے۔مرحوم خالد انور کے والد چوہدری محمد علی پاکستان کے چوتھے وزیراعظم تھے۔

اُنہوں نے 1962 میں اپنے قانونی کریئر کا آغاز کیا اور تیزی سے شہرت حاصل کی، انہوں نے اے کے بروہی لائر فرم میں مرحوم اے کے بروہی کے ساتھ شراکت داری میں کام کیا۔

خالد انور سابق وزیراعظم  نواز شریف کی حکومت میں 1997 تا 1999 ملک کے وزیر قانون رہے۔